Hewlêr (Rûdaw) - Li bazar, sûk û cihên dîrokî yên Amedê qerebalixiyeke zêde heye.
Li her sê bajarên dîrokî û gastronomiyê Amed, Mêrdîn û Rihayê yên Bakurê Kurdistanê, ji bilî amadekariya cejnê di sektora geştyariyê de jî tevgereke zêde heye.
Otel, restorant, dikandar û şiranîfiroşên Amedê amadekariyên ji bo geştyarên cejnê temam kirine li hêviya mêvanên xwe ne.
Serokê Komeleya Otel û Geştyariyê ya Amedê Denîz Guler got:
“Ameda me ya ku di sektora geştyariyê de bi bandor e bi destpêkirina demsalê re meha Adarê ji cejna Remazanê re amade ye.
Em bi otel, gastronomî û cihên dîrokî û her awayî ji cejnê re amade ne.
Niha otelên me ji ji sedî 70 tijî bûne û em hêvî dikin ev rêje di cejnê de zêde bibe.”
Li Mêrdînê jî bi heman awayî tevgereke zêde ya geştyariyê heye.
Li bajarê ku 85 otel û şûna 20 hezar kesan a mayînê heye rezervasyonên otelan ji sedî 100 tijî bûne.
Serokê Komeleya Geştyariyê û Otelan a Mêrdînê Ozgur Gurgor anî ziman:
“Di betlaneya cejnê de daxwazeke zêde heye.
Bi taybetî her du betlane bûne yek û dema betlaneyê dirêj bû.
Ez niha dikarim bibêjim Mêrdîn tijî bû.”
Herê zêde avahî û mîmariya dîrokî ya Mêrdînê bala geştyaran dikişîne.
Geştyar Fatma Adiguzelê da zanîn:
“Mêrdîn wekî ku min xeyal dikir e û hîn xweştir e jî.
Herî zêde li li hemberî saxlembûna manastiran û Bajarê Dîrokî yê Darayê mat mam.”
Li Rihayê jî ku navendeke girîng a geştyariya olî û gastronomiyê ye li cihên dîrokî, olî û bazaran qerebalixiyeke zêde heye.
Tê çaverêkirin ku di Cejna Remezanê de û heta dawiya hefteya bê, çûn û hatin li van her sê bajarên Bakurê Kurdistanê zêdetir bibe.
Amed, Mêrdîn û Riha di sektora geştyariyê de wekî Sêgoşeya Zêrîn a Mezopotamyayê tên binavkirin.
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse