Bexda (Rûdaw) - Serokê Saziya Deriyên Sînor ên Iraqê ragihand, ku rêveberiya deriyên sînor ên li Herêma Kurdistanê ne di bin kontrola rêveberiya navendî ya Iraqê de ye.
Serokê Saziya Deriyên Sînor ên Iraqê Kazim El Iqabî îro roja duşemê (29-10-2018) li bajarê Bexda yê paytexta Iraqê civîneke çapemeniyê saz kir û diyar kir ku rêveberiya deriyên sînor ên li Herêma Kurdistanê ne di bin kontrola rêveberiya navendî ya Iraqê de ye û got, bo kontrola van deriyên sînor bikeve destê Bexdayê divê hikûmeta nû ya Iraqê hinek pêngavan biavê.
Kazim El Iqabî got: “Deriyên sînor ên Herêma Kurdistanê hêj ser bi wir ve kar dikin. Piştî biryar hat dayîn ku divê ev kontrol bikeve destên rêveberiya navendî, di derbarê radestkirina van sînoran bo Bexdayê me li gel Herêma Kurdistanê pêşrêkevtinek dualî îmza kir.”
El Iqabî ragihand ku helwesta Herêma Kurdistanê ya di vê mijarê de erênî bû lê niha hinek astengî hene û got, bo kontrola hemû deriyên Iraqê bikeve yekdestî divê hikûmeta Adil Ebdulmehdî û hikûmeta Herêma Kurdistanê hinek pêngavan biavêjin.
Serokê Saziya Deriyên Sînor ên Iraqê herwiha li der vekirina deriyekî nû di navbera Iraq û Tirkiyê de jî got, me bo vê yekê 4 alternatîf pêşkeşî hikûmeta Heyder Ebadî kiribû lê em hêj li benda bersivê ne.
Herêma Kurdistanê bi tevahî 8 deriyên sînor kontrol dikin, ku yek li ser sînorê Bakurê Kurdistanê ye bi navê Deriyê Sînor ê Xelîl Îbrahîm (Xabûr), 3 derî bi awayekî fermî li ser sînorê Rojhilatê Kurdistanê ne, ku bi navên Deriyê Hacî Omeran, Deriyê Perwezxan û Deriyê Başmax û dîsa 3 deriyên ne fermî li ser sînorê Rojhilatê Kurdistanê ne, bi nave Kele, Seyranben û Tewêlê û deriyek jî li ser sînorê Rojavayê Kurdistanê ye bi navê Deriyê Fîxabûr. Kêşeya deriyên sînor bi taybetî piştî bûyerên 16ê Cotmehê di navbera Herêma Kurdistanê û Iraqê de bû mijar.
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse