Pişta Batman Petrolsporê nayê xwarê: 'Em dê bibin şampiyon'
Êlih (Rûdaw) - Tîma Batman Petrolspora tîma Êlihê wekî ba û birûskê ye û li kesî nasekine.
Batman Petrolspor di Lîga 2yemîn a Federasyona Futbolê ya Tirkiyeyê de bi performanseke serkeftî balê dikişîne ser xwe.
Tîma Êlihê ku heta niha di 9 pêşbirkan de têk neçûye, bi 7 serkeftin û 2 wekheviyan 23 puan kom kirine û serkêşiya lîgê dike.
Armanca sereke ya tîmê ew e ku di dawiya sezonê de bibe şampiyon û derbasî Lîga Yekemîn bibe.
Tîma reş, spî û sor niha bi moraleke bilind xwe ji bo pêşbirka li hemberî Karacabey Belediyespora tîma Bursayê amade dike û futbolîstên tîmê ji serkeftinê bawer in.
Futbolîst Ciwan ji Rûdawê re got: "Em xwe amade dikin. Di antrenmanan de em hêdî hêdî digihîjin asta xwestî."
“Em dê rasterast bibin şampiyon”
Futbolîst Atabey Çîçek hêviya xwe wiha anî zimên:
"Înşalah îsal em dê karê xwe nehêlin ji play-offê re. Ez wisa bawer im ku em dê rasterast bibin şampiyon.
Lê helbet şampiyonî jî di van pêşbirkan re derbas dibe. Înşalah em dê pêşbirka Karacabeyê qezenc bikin û 3 puanan bistînin."
Futbolîst Îshak Çakmak da zanîn:
"Em ji bo 3 pûanan diçin. Qet şik û gumana min nîne ku em dê 3 pûanan bi dest bixin.
Niha di tîmê de rewşeke gelekî baş heye û moralê me bilind e.
Her kes vê yekê dibîne. Par me pir dixwest lê armanca me pêk nehat.
Înşallah em dê îsal wê kupayê bistînin û bi ser bikevin."
Rahênerê tîmê Serdar Bozkurt jî bal kişand ser girîngiya pêşbirkê û got ku di lîgê de tîmên lawaz nînin û divê li hemberî her tîmê amadehiyeke baş bê kirin.
Rahêner Serdar Bozkurt jî anî ziman:
"Çaryeka lîgê qediya. Em dê biçin Karacabeyê, deplasmaneke girîng e.
Pêşbirkeke pir dijwar li pêşiya me ye. Em amadehiyên xwe li gorî wê dikin.
Em dixwazin 3 pûanan bistînin û rêya xwe berdewam bikin.
Hemû pêşbirk girîng in. Em ji bo her pêşbirkê amadehiyên baş dikin.
Înşallah em dê pêşbirk bi pêşbirk bi ser bikevin û dawiya sezonê em dê Batman Petrolsporê derbasî Lîga Yekem bikin."
Pêşbirka Batman Petrolspor û Karacabey Belediyesporê dê roja yekşemê li Bursayê bê lîstin.
Tîma Êlihê dixwaze ji vê deplasmana girîng bi 3 pûanan vegere.