Hewlêr (Rûdaw) - Recep Tayyîp Erdogan û Donald Trump di pêwendiyeke telefonî de li ser agirbesta şerê li Îranê û pêşhatên dawî yên li herêmê dan û standin kirin.
Serokatiya Ragihandinê ya Serokkomariya Tirkiyeyê ragihand ku Serokkomarê Tirkiyeyê Recep Tayyîp Erdogan û Serokê Amerîkayê Donald Trump pêwendiyeke telefonî pêk anî.
Di vê pêwendiyê de serokên her du welatan bi giranî li ser agirbesta du hefteyî ya di navbera Amerîka û Îranê de rawestiyan.
Her wiha wan pêşhatên leşkerî û siyasî yên li herêmê nirxandin.
Li gorî daxuyaniyê, Erdogan kêfxweşiya xwe ya ji ber ragihandina agirbestê diyar kiriye.
"Rê neyê dayîn ku pêvajo were sabotekirin"
Erdogan wiha axivî:
“Piştî 40 rojên ku ji bo hemû cîhanê pir dijwar û bi alozî derbas bûn, ev pencereya derfetê ya du hefteyan a ku derketiye pêş, ji bo peymaneke aştiyê ya mayînde derfeteke mezin e.
Divê ev dem pir bi başî were bikaranîn û rê neyê dayîn ku ev pêvajo were sabotekirin.”
Recep Tayyîp Erdogan tekezî li ser rola welatên herêmê jî kir û destnîşan kir ku Tirkiye dê piştgiriya xwe ya ji bo hewldanên çareseriyê yên ku li gel Pakistan û welatên din ên dost û bira tên meşandin, bi awayekî xurt bidomîne.
Ev pêwendiya serokên her du welatan piştî wê yekê hat ku Donald Trump ragihandibû ew li ser bingeha navbeynkariya Pakistanê û pêşniyara 10 xalî ya Îranê, êrişên li ser wî welatî ji bo du hefteyan rawestandine.
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse