Renc Heyder\ Wêne û Vîdeo: Rûdaw
Dusseldorf (Rûdaw) - Renc Heyderê 32 salî li Silêmaniyê ji dayîk bûye. Ew sala 1996an bi malbata xwe re çûye Almanyayê û li wir mezin bûye. Renc li Almanyayê beşa dîzayna pêwendiyan xwendiye.
Wî di warê vîdeografî û fotografiyê de pisporî wergirtiye.
Piştî zanîngehê wî fêm kiriye ku ew ji karê destan û çêkirina tabloyan hez dike. Ew naxwaze li ser komputerê bixebite, lewma wî berê xwe daye wênesaziyê.
Zexta malbatê û hilbijartina hunerê
Renc Heyder bû mêhvanê Bernameya Diyasporayê û pirsên Hêmin Ebdulah bersivandin.
Renc qala destpêka karê xwe kir û got ku bi çêkirina tabloya yekem mêjiyê wî aram bûye.
Malbata wî zext lê kiriye da ku bibe endezyar an jî bijîşk. Lê wî xwestiye rêya xwe bi xwe bibîne û huner hilbijartiye.
Wênesazê Kurd bawer dike ku gelek hunermendên Kurd ên jêhatî hene lê qedrê wan nayê zanîn.
Renc beriya du salan çûye Silêmaniyê û li Kargeha Kulturê (Kargeha Cixareyan a Berê) stodyoyek vekiriye.
Wî xwestiye dest bi projeyeke hunerî bike lê ji ber nexweşiyê mecbûr maye û vegeriyaye Almanyayê.
Tevî vê yekê jî ew plan dike ku vegere Silêmaniyê û demekê li wir bixebite.
Ew hêvî dike ku nêzîkbûna ji welat û xweza bandorê li stîla wî ya hunerî bike.
Gazinca hevjînê û tabloya lihevhatinê
Hunermend Renc Heyder qala jiyana xwe ya taybet jî kir û eşkere kir ku malbata wan malbateke hunerî ye.
Ew û hevjîna xwe Melissa 6 sal in bi hev re ne. Du kurên wan ên bi navên Noyar û Dalî hene ku yek salekî û yê din 4 salî ye.
Renc da zanîn ku hemû endamên malbata wî ji wênesaziyê hez dikin. Ew gelek caran zarokên xwe jî dibe stodyoyê da ku bi hev re wêneyan çêbikin.
Ew hunermend çîroka tabloyekê vedibêje ku wêneya hevjîna wî ye.
Piştî ku di navbera wan de alozî derketiye, wî ev tablo çêkiriye. Hevjîna wî gazinc kiriye û gotiye, "Tu wêneya jinên din çêdikî lê ya min çênakî."
Li ser vê yekê Renc hefteyekê rojane 10-12 demjimêran li ser tabloyê xebitiye.
Piştî ku wî tablo nîşanî hevjîna xwe daye, ew li hev hatine û hevjîna wî gelekî kêfxweş bûye.
Navê wî bi xeletî bûye "Reng"
Wênesaz Renc qala stîla xwe ya hunerî kir û diyar kir ku ew pêşî rengan bi awayekî tevlîhev bi kar tîne û paşê rûyan ji nav rengan derdixe.
Navê stodyoya wî ya li bajarê Bochumê yê Almanyayê "Reng" e.
Wî eşkere kir ku dema ew çûne Almanyayê, dê û bavê wî bi xeletî navê wî wekî "Reng" tomar kiriye.
Lê niha ev nav bûye beşeke girîng a jiyan û hunera wî. Wî her wiha da zanîn ku stodyoya wî li cihê depoyeke kevn a trênan e.
Renc li stodyoya xwe qala karên xwe kir û diyar kir ku studyoya wî ne tenê ji bo nîşandan û firotina tabloyan e.
Ew der di heman demê de cihê fêrkirinê ye jî. Ew her rojên în û şemiyê atolyeyan saz dike.
Beşdar dikarin di 3 demjimêran de tabloyekê çêbikin û bi xwe re bibin malê.
Heta eger ti zanyariyên wan ên wênesaziyê nebin jî ew dikarin fêr bibin.
Têkelkirina rengan û hestên aramiyê
Renc tabloyek amade kiribû da ku bi Hêmin Ebdulah re karekî hunerî yê hevbeş bikin.
Wî diyar kir ku hemû reng ji têkelkirina rengên sereke (zer, sor, şîn, reş û spî) çêdibin.
Renc Heyder bal kişand ser wê yekê ku çêkirina tabloyê pêwîstî bi planeke pêşwext nîne.
Xweşiya kar ew e ku mirov ji nişka ve dest pê bike û tenê reng û amûrên guncav hilbijêre.
Ew wênesaz qala bingehên têkelkirina rengan dike. Wekî mînak, rengê şîn û zer bi hev re rengê kesk çêdikin.
Lê ew diyar dike ku ne pêwîst e hemû reng bi temamî werin têkelkirin.
Mirov dikare wan li kêleka hev deyne da ku bandoreke cuda çêbike.
Hêmin Ebdulah jî beşdarî projeyê bû û bi rênimayên Renc reng têkel kirin.
Wî anî zimên ku di dema karkirinê de hesteke wî ya "gelekî xweş û taybet" çêbûye û ew pê aram bûye.
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse