سەوزە و میوەی خۆماڵی کەم دەبێتەوە و لە ئێران و تورکیاوە هاوردە دەکرێن

 

 

سەروەر عەلی، بەرپرسی سەندیکای عەلوەی سلێمانی، ئەمڕۆ شەممە بە تۆڕی میدیایی رووداوی گوت: "بەهۆی نەمانی بەرهەمی نێوخۆوە، دەرگای هاوردەکردنی تەماتە و شووتی کراوەتەوە و ئێستا لە ئێرانەوە دێن".

 

تەماتەی ئێرانی ئێستا لە عەلوەکاندا بە کۆ کیلۆی 750 دینار، شووتی بە 350 دینارە. سەروەر عەلی گوتی: "بڕێکی کەم شووتی گەرمیان و ئیدارەی راپەڕین ماوە و کیلۆیان بە کۆ 450 دینارە".

 

لەبارەی بەرهەمی نێوخۆوە، بەرپرسی سەندیکای عەلوەی سلێمانی گوتی: "پەتاتە، هەنار و کولەکە ماون و بەشێکیان هەناردەی نێوەڕاست و خوارووی عێراق دەکرێن. ئەوانەی نەماون لە دەرەوە هاوردە دەکرێن".

 

رەجەب حاجی عەزیز، سەرۆکی ئەنجوومەنی عەلوەی هەولێر، ئەمڕۆ بە تۆڕی میدیایی رووداوی گوت: "بەرهەمی نێوخۆ بەتەواوی کەم بووەتەوە؛ باینجان، هەنار و کەمێک خەیاری نێوخۆ ماون".

 

لە وەرزی هاویندا بەشێکی سەرەکیی سەوزە و میوەی هەرێمی کوردستان بەرهەمی خۆماڵین. سەرۆکی ئەنجوومەنی عەلوەی هەولێر دەڵێ: "ئێستا زۆرینەی بەرهەمی عەلوە لە دەرەوە هاوردە دەکرێ و جێگەی بەرهەمی نێوخۆیان گرتووەتەوە".

 

رەجەب حاجی عەزیز گوتی: "زۆرینەی سەوزە و میوەی هەرێمی کوردستان بە پلەی یەک لە ئێران، پاشان تورکیا، میسر و ئەفریقاوە هاوردە دەکرێن".

 

لەکاتی پێگەیشتنی هەر بەرهەمی نێوخۆدا هاوردەکردنی قەدەخە دەکرێ یان باجی زۆری دەخرێتەسەر. ئێستا بەهۆی نەمانی ئەو بەرهەمانەوە هاوردەکردنی زۆرینەیان ئاسایی بووەتەوە.