ئەندامێکی لیژنەی دارایی پەرلەمان: ئەم ساڵ کێشە بۆ مووچەخۆرانی هەرێمی کوردستان دروست نابێت

 

 

جەمال کۆچەر، ئەندامی لیژنەی دارایی پەرلەمانی عێراق ئەمڕۆ شەممە 3ی ئایاری 2025 بە تۆڕی میدیایی رووداوی راگەیاند، "ئەم ساڵ کێشە و گرفت بۆ مووچەی فەرمانبەران و مووچەخۆرانی هەرێمی کوردستان دروست نابێت. مانگانە حکومەتی عێراق پارەی مووچە رەوانە دەکات."

 

ئەندامەکەی لیژنەی دارایی پەرلەمانی عێراق، کە هاوکات سەرۆکی فراکسیۆنی یەکگرتووی ئیسلامیی کوردستانە، ئەمە بۆ سێ هۆکاری سەرەکی دەگەڕێنێتەوە، کە ئەوانیش بریتین لە:

 

یەکەم: هەڵبژاردنی پەرلەمانی عێراق نزیک بووەتەوە و محەممەد شیاع سوودانی، سەرۆکوەزیرانی عێراق کارێکی وا ناکات کە دڵی کورد لە خۆی بڕەنجێنێت کە دەیەوێت جارێکی دیکە ببێتەوە سەرۆکوەزیران.

 

دووەم: بڕیاری دادگەی باڵای فیدراڵیی عێراق هەیە کە دەبێت مووچە رەوانە بکرێت، لەگەڵ رادەستکردنی هەندێک لە داهاتی ناوخۆیی. 

 

سێیەم: بە گوتەی جەمال کۆچەر، ئەوەیە کە حکومەتی عێراق بۆ مووچە پەنای بۆ یەدەگی بیانی بردووە، بەمەش کێشەی تەرخانکردنی پارەی پێویستی بۆ دروست نابێت.

 

حکومەتی عێراق مووچەی مانگی نیسانی مووچەخۆرانی خۆی دابەشکردووە، بەڵام هێشتا مووچەی مووچەخۆرانی هەرێمی کوردستان نەنێردراوە.