نەوت بەرزبووەوە و پێنوێنی بازاڕەکان دابەزی؛ جەنگ مەترسیی لەسەر وزە دروستکردووە

 

بازاڕە جیهانییەکان لە پشێویدان لەوەتەی لە رۆژی شەممەوە ئەمریکا و ئیسرائیل هێرشیان کردوەتە سەر ئێران و رێبەری باڵای ئەو وڵاتەیان کوشت، کە بووەهۆی زنجیرەیەک هێرشی تۆڵەسەندنەوە لەلایەن تارانەوە بۆ سەر ئیسرائیل و وڵاتانی ناوچەکە.

 

 

ئێران گەرووی هورمزی داخستووە، کە پێنجیەکی نەوتی جیهان و گازی شلی لێوە دەگوازرێتەوە.

 

نەوتی برێنت: بە رێژەی 3.5% بەرزبووەوە و گەیشتە 84.25 دۆلار.

 

نەوتی تێکساس: بە رێژەی 4.5% بەرزبووەوە و گەیشتە 78.19 دۆلار.

 

لە رۆژی هەینییەوە نرخی نەوتی برێنت زیاتر لە 16% بەرزبووەتەوە، ئەوەش ترسی لە بەرزبوونەوەی هەڵاوسان و مانەوەی رێژەی سوود بە بەرزی دروستکردووە.

 

 

پاتریک ئۆهێر، شرۆڤەکار دەڵێت، هۆکاری بەرزبوونەوەکە بۆ راپۆرتە پشتڕاستنەکراوەکان دەگەڕێتەوە کە باس لەوە دەکەن ئێران کەشتییەکی نەوتهەڵگری لە کەناراوەکانی عێراق پێکاوە، هەروەها بەهۆی ئەوەی جموجووڵ لە گەرووی هورمز تا رادەیەکی زۆر وەستاوە.

 

کۆمپانیای کەیپلەر بۆ شرۆڤە و توێژینەوەی وزە رایگەیاند، تێپەڕینی کەشتییە نەوتهەڵگرەکان لە گەرووی هورمز بە رێژەی 90% کەمیکردووە بەراورد بە هەفتەی رابردوو.

 

 

سەرەڕای ئەوەی دۆناڵد ترەمپ، سەرۆکی ئەمریکا بەڵێنی داوە هێزی دەریایی وڵاتەکەی رێڕەوە بازرگانییەکان بپارێزێ، بازرگانان هێشتا بە گومانن. 

 

کێن کرۆمپتن، شرۆڤەکارە و دەڵێت: "راستییەکە ئەوەیە پاراستنی هەموو کەشتییەکان لە ناوچەکەدا کارێکی ئەستەمە."

 

کاریگەری لەسەر چین و بازاڕەکان

 

بەپێی راپۆرتی بلومبێرگ، چین بەهۆی ترسی لە کەمبوونەوەی سووتەمەنی، داوای لە پاڵاوگە گەورەکانی کردووە هەناردەکردنی بەنزین و گازوایل رابگرن.

 

 

بازاڕەکانی ئەورووپا (لەندەن، پاریس، فرانکفۆرت) دابەزینیان تۆمار کرد.

 

بازاڕەکانی ئەمریکا (وۆڵ ستریت) بە دابەزین دەستیانپێکرد.

 

بازاڕەکانی ئاسیا (تۆکیۆ، سیئۆل، هۆنگ کۆنگ) بەرزبوونەوەیان تۆمار کرد.