قەدەخەی هاوردەکردنی تەماتە لە ئێرانەوە نرخەکەی لە سلێمانی بەرزکردەوە

 

رەجەب حاجی عەزیز، سەرۆکی ئەنجوومەنی عەلوەی هەولێر، رۆژی شەممە، 7ـی شوباتی 2026، بە تۆڕی میدیایی رووداوی گوت: "دۆخی ئێران و ئەمریکا و ئاڵۆزییەکانی ئێران هیچ کاریگەرییان لەسەر دەروازەکان نەبووە و تاوەکو ئەمڕۆ هاوردەکردنی سەوزە و میوەی ئێرانی بەردەوامە".

 

سەرۆکی ئەنجوومەنی عەلوەی هەولێر گوتی: "جگە لە چەند بەرهەمێکی کەم، بەرهەمی نێوخۆی هەرێمی کوردستان لە عەلوەدا نەماوە و ئەوەی هەیە هاوردەیە. هاوردەکانیش زۆرینە لە ئێرانەوە دەهێندرێن و نرخیش تاوەکو رادەیەک جێگیرە و بەرز نەبووەتەوە".

 

پەتاتە، قەڕنابیت، کەلەرم، شێلم و چەوەندەر ئەو بەرهەمە نێوخۆییانەی هەرێمی کوردستانن کە تاوەکو ئێستا لە بازاڕەکاندا هەن و هاوردە ناکرێن.

 

سەروەر عەلی، بەرپرسی سەندیکای عەلوەی سلێمانی، رۆژی شەممە بە تۆڕی میدیایی رووداوی گوت: "ئاڵۆزییەکانی ئێران و دۆخەکە هیچ کاریگەرییەکی لەسەر هاوردەکردنی سەوزە و میوەی ئەو وڵاتە بۆ هەرێمی کوردستان نەبووە و زۆرینەی عەلوە بەرهەمی ئەوانە".

 

 

بەهۆی پێگەیشتنی تەماتەی سنووری بەسرەوە، لە 6ـی ئەم مانگەوە هاوردەکردنی تەماتە قەدەخە کراوە. بەرپرسی سەندیکای عەلوەی سلێمانی گوتی: "نرخی تەماتە تاوەکو پێنجشەممە بە کۆ 400 بۆ 500 دینار بوو کیلۆی، ئێستا بەرزبووەتەوە بۆ 750 دینار، ئەوەش بەهۆی قەدەخەکردنی هاوردەوەیە لە ئێرانەوە".

 

بەڵام رەجەب حاجی عەزیز دەڵێت: "تەماتەی ئێرانیی زۆر هاوردەکراوە بۆ عەلوەی هەولێر، بۆیە تاوەکو ئەمڕۆ نرخ بەرز نەبووەتەوە".

 

بە گوتەی سەرۆکی ئەنجوومەنی عەلوەی هەولێر، نرخی تەماتە وەک پێشترە لە عەلوەکەیان و بەگوێرەی جۆرەکەی لە 400 بۆ 750 دینارە.