بانکی رافیدەین گرێبەست لەگەڵ کۆمپانیایەکی ئەمریکی بۆ رێگری لە سپیکردنەوەی پارە واژۆ دەکات

 

 

رێککەوتنەکە لە بارەگای باڵیۆزخانەی عێراق لە واشنتن واژۆ کراوە و ئەو باڵیۆزخانەیە وردەکارییەکەی بڵاوکردەوە.

 

بەگوێرەی بانکی رافیدەین، ئەو گرێبەستە رێککەوتنێکی هاوبەشیی پیشەییە لەنێوان بانکەکە و کۆمپانیای K2 Integrityی ئەمریکی. رێککەوتنەکە بە پشتبەستنە بە بڕیاری ژمارە (23274)ی ساڵی 2023ی ئەنجوومەنی وەزیرانی عێراق.

 

کۆمپانیای K2 Integrityی ئەمریکی لە بواری راوێژکاریی دارایی و چاودێریدا کار دەکات، هاوکات وردبینی لە مامەڵەکانی فرۆشتنی دۆلار دەکات بە نرخی فەرمی، کە لەلایەن بانکی ناوەندیی عێراقەوە بۆ هەناردەکاران دابین دەکرێت.

 

بەگوێرەی رێککەوتنەکە، ئەو کۆمپانیا ئەمریکییە پاکێجێکی گشتگیری خزمەتگوزاری دەداتە بانکی رافیدەین، لەوانەش، بەرەنگاربوونەوەی سپیکردنەوەی پارە و پارەدارکردنی تیرۆر، جێبەجێکردنی سیستمەکانی پابەندبوون بە شێوەیەک کە لەگەڵ پێوەرە نێودەوڵەتییەکاندا بگونجێت، هەروەها بەهێزکردنی ژێرخانی چاودێریی بانکە عێراقییەکان.

 

باڵیۆزخانەی عێراق لە واشنتن دەڵێت، "ئەم هاوئاهەنگییە لە چوارچێوەی ستراتیژیی حکومەتی عێراقدایە بۆ بنیاتنانی کەرتێکی دارایی بەهێز و شەفاف، کە بتوانێت هاوشانی گۆڕانکارییە ئابوورییە جیهانییەکان بێت و پێگەی عێراق وەکو ناوەندێکی دارایی ئومێدبەخش لە ناوچەکەدا بچەسپێنێت."