بارینی بەفر لە شرنەخی باکووری کوردستان نەبووەتە هۆی وەستاندنی بەرهەمهێنانی نەوت

 

 

بۆ ئەوەی رێگەی کێڵگەکانی نەوت لە ئەنجامی بارینی بەفر و سەرمای زۆرەوە دانەخرێن، 120 کارمەند بە 60 ئامێر کاردەکەن و بەفر لە رێگەکاندا لادەبەن.

 

لە 9 کێڵگەی جیاوازی چیای گابار رۆژانە نزیکەی 81 هەزار بەرمیل نەوت بەرهەمدەهێندرێ. هەوڵەکانیش بۆ دۆزینەوەی نەوت لە چەندین شوێنی دیکەی شرنەخ بەردەوامن. بەرپرسانی تورکیا دەڵێن، نزیکەی 3 هەزار کەس لەم بوارەدا کاردەکەن.

 

نەدیم شەن، ئەندازیار لە بەڕێوەبەرایەتیی هەرێمیی کۆمپانیای نەوتی تورکیا (TPAO) لە شرنەخ، زانیاریی لەبارەی کارەکان خستەڕوو و رایگەیاند، ئەوان لە بەرزیی 1800 مەتر و لە سەختترین دۆخدا کاردەکەن.

 

نەدیم شەن گوتی: "لە گابار لەو شوێنانەی بەرزییان دەگاتە 1800 مەتر، کارەکانمان بەبێ پچڕان بەردەوامن. ئێمە لە لایەکەوە رێگاکان دەکەینەوە، لە لایەکی دیکەوە بەرهەمهێنانمان بەردەوامە.  7 رۆژ و 24 کاژێر لەسەر کارین."

 

شەن ئاماژەی بەوەشکرد، لە هەندێک شوێن نزیکەی 2 مەتر و نیو بەفر باریوە و گوتی: "ئێمە بە 60 ئامێری کار و 120 کارمەندەوە کاردەکەین. ئامانجمان ئەوەیە تورکیا لە بواری وزەدا ببێتە وڵاتێکی سەربەخۆ، بۆیە ناهێڵین بەرهەمهێنان بوەستێت."

 

بەگوێرەی ئامارەکان، لە سەرانسەری باکووری کوردستان و تورکیا رۆژانە نزیکەی 180 هەزار بەرمیل نەوت بەرهەمدەهێندرێ و شرنەخ بە بەرهەمهێنانی رۆژانەی 81 هەزار بەرمیل لە پلەی یەکەمدایە.