نێردەی سکرتێری UN بۆ کاروباری عێراق: پرسی بڕینی مووچەی هەرێمی کوردستان کۆتاییهات

 

 

محەممەد حەسان، نێردەی تایبەتی سکرتێری گشتیی نەتەوە یەکگرتووەکان لە عێراق (یونامی)، لەبارەی رێککەوتنی هەولێر و بەغدا و مووچەی فەرمانبەرانەوە قسەی بۆ زیاد ئیسماعیل، پەیامنێری رووداو لە بەغدا کرد و رایگەیاند، "بابەتی بڕینی مووچە کۆتاییهات و هیوادارم بە هەمیشەیی کۆتایی بێت."

 

پێنجشەممەی رابردوو حکومەتی عێراق پارەی مانگی 5ی مووچەی فەرمانبەران و مووچەخۆرانی خستە سەر هەژماری وەزارەتی دارایی هەرێمی کوردستان، هەر زوو دابەشکردنی مووچە دەستیپێکرد و سبەی دابەشکردنی مووچە تەواو دەبێت.

 

نێردەی نەتەوە یەکگرتووەکان هیواشی خواست رێککەوتنی نێوان هەولێر و بەغدا ببێتەهۆی کۆتاییهێنان بە هەموو ناکۆکییەکان و گوتی، "هیوادارم ئەو رێککەوتنە کۆتایی بە هەموو ناکۆکییەکان بهێنێت و جارێکی دیکە نەگەڕێینەوە سەر ئەو بابەتە، چونکە ئەمە پەیوەندی بە بژێویی خەڵکەوە هەیە."

 

محەممەد حەسان ئاماژەی بەوەش کرد، متمانەی بە سەرکردەکانی عێراق و هەرێمی کوردستان هەیە، "متمانەیەکی زۆرم بە دانایی سەرکردەکانی عێراق لە بەغدا و هەولێر هەیە و هیوای سەرکەوتنیان بۆ دەخوازم."

 

بڕیارە رۆژی 11ی تشرینی دووەمی ئەم ساڵ هەڵبژاردنی پەرلەمانی عێراق بەڕێوەبچێت. نێردەکەی نەتەوە یەکگرتووەکان رایگەیاند، "نەتەوە یەکگرتووەکان رۆڵێکی سەرەکی و کارای لەم هەڵبژاردنەدا دەبێت."

 

محەممەد حەسان داوای لە هاووڵاتییان کرد بە بەرپرسیارێتییەوە بەشداری لە پرۆسەکەدا بکەن و گوتی، "داوا لە هاووڵاتییان دەکەم بەرپرسیارانە مامەڵە لەگەڵ دەنگەکانیان بکەن."