نرخی نەوت بەهۆی ئومێدی کۆتاییهاتنی جەنگ دابەزی

 

مەسعود پزیشکیان لە پەیوەندییەکی تەلەفۆنیدا لەگەڵ سەرۆکی ئەنجوومەنی ئەورووپا رایگەیاند، ئێران "ویستی پێویستی بۆ کۆتاییهێنان بەم ململانێیە هەیە، بە مەرجێک داواکارییە بنەڕەتییەکان و گەرەنتییە پێویستەکان بۆ رێگریکردن لە دووبارەبوونەوەی دەستدرێژییەکان دابین بکرێن."

 

ئەم لێدوانانە بوونە هۆی گەشبینی لە ناو بازاڕە داراییەکاندا؛ پێوەری داو جۆنز 2.5٪ (زیاتر لە 1,125 خاڵ) بەرزبووەوە و گەیشتە 46,341.51 خاڵ. ئارت هۆگن، لە دامەزراوەی (B. Riley Wealth Management)، دەڵێت: "ئەمە یەکەم پەیوەندیی کۆنکرێتی و باوەڕپێکراوە کە لە لایەن ئێرانەوە هاتبێت، بازاڕیش دوای پێنج هەفتە لە زیان، تینووی هەواڵی خۆش بوو."

 

نرخی نەوت کە لە 28ـی شوباتەوە بزوێنەری سەرەکیی بازاڕەکانە، ئەمرۆ بە شێوەیەکی بەرچاو دابەزی:

 

نەوتی برێنت: 3.2٪ دابەزی و گەیشتە 103.97 دۆلار بۆ هەر بەرمیلێک.

 

نەوتی تێکساس: 1.5٪ دابەزی و گەیشتە 101.38 دۆلار.

 

سەرەڕای ئەم دابەزینە، ژان ماینیێر، سەرۆکی گرووپی لێکۆڵینەوەی (Kpler)، هۆشداری دا کە ئاسیا رووبەڕووی قەیرانێکی گەورەی وزە دەبێتەوە و گوتی: "وڵاتانی ئاسیا ئێستا زۆرترین باجی ئەم جەنگە دەدەن."

 

لە ناوخۆی ئەمریکا، گوشارەکان لەسەر دۆناڵد ترەمپ بۆ دابەزاندنی نرخەکان زیادی کردووە، چونکە نرخی بەنزین بۆ یەکەمجار لە ساڵی 2022ـەوە بەربەستی 4 دۆلاری بۆ هەر گالۆنێک تێپەڕاند.

 

لەلایەکی دیکەوە، بۆرسەکانی ئەورووپا بە رەنگی سەوز داخران، هەرچەندە ئامارەکان نیشانی دەدەن رێژەی هەڵاوسان لە ناوچەی یۆرۆ لە مانگی ئاداردا بۆ 2.5٪ بەرزبووەتەوە، کە هۆکارە سەرەکییەکەی گرانیی وزەیە.