رووداو دیجیتاڵ
یانەی ئارسیناڵی ئینگلیزی دووبارە بۆ ڤینیسیۆس جۆنیۆر دێتەوە سەرهێڵ و ئامادەیە بڕە پارەیەکی زۆر و ئەستێرەیەکی ئیسپانی بدات بۆ رازیکردنی ریال مەدرید بۆ دەستبەرداربوون لە یاریزانە بەرازیلییەکەی.
ئارسیناڵ بیر لە گواستنەوەی ڤینیسیۆس جونیۆری ئەستێرەی بەرازیلی و یاریزانی یانەی ریال مەدرید دەکاتەوە، ئەگەری هەیە مارتن زوبیمێندیی یاریزانی ئیسپانی لە گرێبەستێکی گۆڕینەوەدا بگرێتەوە لەگەڵ بڕە پارەیەک. ئامانج لێی بەهێزکردنی بژاردەی هێڵیی هێرشبەری تیپەکەیە لەژێر دەستی میکێل ئارتێتا.
بەگوێرەی میدیای ئینگلتەرا، یانە لەندەنییەکە لە ئەگەری گواستنەوەی ئەو یاریزانە بەرازیلییە بەدواداچوون دەکات و ناوی ئەو یاریزانە ئیسپانییە وەک بەشێک لە دانوستاندنەکانی لەبەرچاو دەگیرێت. ئەم سیناریۆیە دەتوانێت دەرفەتێکی لەبار بۆ هەردوو لایەن بخاتەڕوو.
راپۆرتە رۆژنامەڤانییەکان ئاماژە بەوە دەکەن کە میگێل مۆلینا ئەندامی ستافی راهێنەرایەتی ئارتێتا لە مانگی ئەیلوولی ساڵی رابردوودا پشتڕاستی کردەوە کە بەڕاستی لە گفتوگۆکانی گواستنەوەی یانەکەدا باسی ڤینیسیۆسی تەمەن 26 ساڵ کراوە، بەڵام یاریزانە بەرازیلییەکە لەگەڵ یانەی ریال مەدرید مایەوە، دواتر گرێبەستێکی نوێی واژۆکرد و تاوەکو مانگی حوزەیرانی 2032 درێژکرایەوە.
ئەم رێککەوتنە نوێیە پێگەیەکی بەهێزی دانوستانکاری بە ریال مەدرید دەبەخشێت، چونکە یانە ئیسپانییەکە رووبەڕووی هیچ گوشارێکی دەستبەجێ نابێتەوە بۆ جیابوونەوە لە یەکێک لە یاریزانە سەرەکییە هێرشبەرەکانی. ئەمەش بەو مانایەیە کە ئارسیناڵ پێویستی بە پێشکەشکردنی دەستەوارەیەکی دارایی گرانبەها دەبێت بۆ ئەوەی ریال مەدرید رازی بکات بە رۆیشتنی ڤینی بۆ لەندەن رازی بێت.
خستنەڕووی زوبیمێندی لە گرێبەستە پێشنیازکراوەکەدا دەتوانێت ئەو دەستەوارەیە زیاتر سەرنجڕاکێش بێت بۆ یانە ئیسپانییەکە. یاریزانە ئیسپانییە تەمەن 27 ساڵەکە لە هاوینی 2015 لە یانەی ریال سۆسیدادەوە پەیوەندی بە یانەی گانەرزەوە کرد و بەبڕی 60 ملیۆن پاوەند پەیوەندی بە ئارسیناڵەوە کرد، بۆ ئەوەی هێڵی ناوەڕاستی تیپەکە بەهێزتر بکات لەژێر سەرپەرشتی میکێل ئارتێتا.
ئەوەی یارمەتیدەرە بۆ گواستنەوەی زوبیمێندی بۆ ریال مەدرید ئەوەیە کە ماوەی یاریکردنی ئاسایی لە باکووری لەندەن زۆر کەمە و تاوەکو ئێستا تەنیا 289 خولەک بەشداری کردووە.
ریال مەدرید ماوەیەکە بەدوای یاریزانێکی نوێی بەرگریدا دەگەڕێت، زوبیمێندیش کە لەماوەکانی پێشوویدا لە لالیگادا ئاستێکی بەرزی پێشکەش کردووە، لەوانەیە ببێتە بژاردەیەکی گونجاو بۆ بەهێزکردنی هێڵی ناوەڕاستی یانەکەی.
بۆ ئارسیناڵ پاڵنەرەکانی گرێبەستکردن لەگەڵ ڤینیسیۆس روونن، لەم هاوینەدا گابرێل مارتینێلی و لیاندرۆ ترۆساردی لەدەستداوە و تەنیا گرێبەست لەگەڵ کریستۆس تزۆلیس کردووە بۆ ئەوەی بژاردەکانی هێرشبەری بەهێزتر بکات.
گرێبەستکردن لەگەڵ ڤینیسیۆس زیادکردنێکی بەرچاو دەبێت لەڕووی ئەزموونی هێرشبردن و کوالیتی تاکەکەسی، بەهۆی توانای بڕینی بەرگریکاران و دروستکردنی هەل و تۆمارکردنی گۆڵ؛ ئەو سیفەتانەی کە بژاردەی زیاتر بە هێڵی پێشەوەی ئارتێتا دەبەخشن، بەڵام تەواوکردنی گرێبەستەکە ئاسان نابێت، بەتایبەتی بە لەبەرچاوگرتنی گرێبەستە درێژخایەنەکەی یاریزانە بەرازیلییەکە لەگەڵ ریال مەدرید و رۆڵی گرنگی لەناو تیپەکەدا.
