رووداو دیجیتاڵ
قەیرانی کۆندۆم بەرۆکی یارییەکانی ئۆڵۆمپیادی زستانەی گرتووە لە ئیتاڵیا. رۆژنامەکانی ئیتاڵیا دەڵێن "کەشوهەوای سارد و رۆژی ڤالانتاین بوونە هۆی تەواوبوونی کۆندۆم لە گوندی ئۆڵۆمپی دوای تێپەڕبوونی تەنیا 3 رۆژ بەسەر دەستپێکردنی یارییەکان. لیژنەی ئۆڵۆمپی نێودەوڵەتیش بەڵێنی بە وەرزشوانان داوە کە بڕی زیاتریان بۆ دابین بکات.
راپۆرتە رۆژنامەڤانییەکان ئاماژە بەوە دەکەن کە 10 هەزار کۆندۆمی بێبەرامبەر کە بەسەر وەرزشواناندا لە ئۆڵۆمپیادی زستانەی میلانۆ - کۆرتینا 2026 دابەشکرابوون، تەنیا لە ماوەی سێ رۆژدا تەواو بوون. وەرزشوانێک کە قسەی بۆ میدیاکان کردووە، دەڵێت "کۆندۆمەکان لە ماوەی سێ رۆژدا نەمان. گوتیان بڕی زیاتر لەڕێگایە، بەڵام کەی؟ کێ دەزانێت".
لە ساڵی 1988ـەوە لە ئۆڵۆمپیادەکاندا کۆندۆم بەشێوەی بێبەرامبەر بۆ وەرزشوانە بەشداربووەکان دابین دەکرێت. ئەو بڕە کۆندۆمەی کە دابینکرابوون و نزیکەی 10 هەزار دانە بوو لە گوندی ئۆڵۆمپی بەخێرایی تەواوبوون، ئەمەش رێکخەرانی تووشی سەرسوڕمان کردووە.
رێکخەرانی یارییەکان پشتڕاستیان کردەوە کە پلانیان هەیە بڕی زیاتر دابین بکەن، بەڵام خشتەیەکی کاتیی روونیان بۆ دووبارە پڕکردنەوەی کۆگاکان رانەگەیاندووە. ئەمەش وەرزشوانانی تووڕە کردووە.
هەرچەندە ژمارەی وەرزشوانان لە یارییەکانی زستانەدا کەمترە لە 3 هەزار کەس، بەڵام ئاماژە بەوە دراوە کە خواستەکە هاوتەریب بووە لەگەڵ شێوازەکانی پێشووی ئۆڵۆمپیادەکان. لە دوای ئۆڵۆمپیادی سیئۆلی کۆریای باشوور لەساڵی 1988ـەوە، دابەشکردنی کۆندۆمی بێبەرامبەر وەک رێکارێکی ستاندارد بەردەوامە بۆ هاندانی سێکسی سەلامەت و زیادکردنی هۆشیاری دەربارەی ڤایرۆسی ئایدز HIV و ئەو نەخۆشییانەی لەڕێگەی سێکسەوە دەگوازرێنەوە.
بۆ بەراوردکردن، لە ئۆڵۆمپیادی پاریس 2024دا نزیکەی 300 هەزار کۆندۆم بۆ وەرزشوانان دابینکرابوو، کە دەکاتە تێکڕای دوو کۆندۆم بۆ هەر بەشداربوویەک لە رۆژێکدا. پێدەچێت کەمیی بڕی دابینکراو لە میلانۆ-کۆرتینا 2026 بووبێتە هۆی ئەوەی کە لە سەرەتای یارییەکاندا کۆگاکان بەتاڵ ببن.