ئێستا كاتی شكاندنی بێدەنگیمە... بەو ئومێدەی كاك فەرهاد نیگەران نەبێت
رۆستهم ئاغاله
تێنەگەیشتن لە مرۆڤ وایكردووە مرۆڤەكان چاودێری یەكدی بكەن و سیخوڕی، دووزمانی، ببێتە شێوازی پەلاماردان. هونەر و فەلسەفە كە هاتنە ناو ژیانی كۆمەڵەوە بۆ تێگەیشتن بوو لە ئیستاتیكا و هزری شاراوەو لێكدانەوەی شیكاری بۆ ئاسانكاری كرانەوەی عەقڵ .
ئێمە گوزارشت لە خوا و مرۆڤ و سروشت و زیندەوەران دەكەین، بەبێ ئەوەی تێیانبگەین و پێیانبگەین، تێیاننەگەیشتووین بۆیە باسی كاریگەرییەكانیان دەكەین . تێنەگەیشتنی مرۆڤ بۆ دەوروبەری كۆتایی نایێت، چونكە بەردەوام شتی نوێ دێتە ئاراوە، لەو شتانە تێناگەین، تاوەكو نەبنە رابردوو. مرۆڤی تازە قوت دەبێتەوە، مرۆڤێكی سادە یان برسی یان كورتەبنە یان مرۆڤێكی نیشتمانپەروەری كرمانج دەبێتە سەرقافڵەی نیشتمان و مرۆڤایەتی. تێنەگەیشتنی مرۆڤ بۆ مرۆڤ وایكردووە تووشی سەرسوڕمان و هەڵە ببین بەرامبەر بەیەكتر و رەفتار و گوفتارمان و بە ئاسانی لەیەك تێنەگەین.
لە كوردەواریدا دەركەوتنی كەسە نائاساییەكان درەنگ قوتدەبێتەوە، تێگەیشتن لێیان زەحمەت و ئاڵۆزی دەنێتەوە، كورد و كۆمەڵگەی ئیسلامی هەمیشە بیری رۆژئاوایی بەدەرنگەوە وەردەگرن. تاوەكو بیرۆكەیەك لاساییەك لە بیرو هونەر شوێنی خۆی دەكاتەوە، خوێنی بۆ دەڕێژرێت.
ئەو مرۆڤە هاوچەرخە نێودارەی زۆرترین كلیكی لەسەر كراوە بە رفتارە سەیر و نائاساییەكانی فەرهاد پیرباڵە.
تێگەیشتن لە هونەرەكەی رێگە بۆ من ئاسان دەكات تاوەكو كەسایەتیشی شرۆڤە بكەم، هەروەها نامەوێ لەسەر بواری وێژەو موسیقا و ڤیدیۆكانی هیچ شت بوروژێنم، چونكە بابەتی من نین.
نەدەبوو من یەكەم كەسی شارەزای بوارەكە بم لەسەر بزاوی هونەری كاك فەرهاد بێمە گۆ . كە هاتیشم درەنگ هاتووم. نایشارمەوە ئەو پیاوە سەركێشە و نائاساییە، هەولێری وتەنی عەنتیكەیە، چییە زوومی خەڵكی خستووەتە سەر خۆی.
كتوپر دەركەوتنی نووسەرێكی بواری بزاوی هونەری شێوەكاری و شاعیر و چیرۆكنووس، خۆ نمایشكردنی وەك هونەرمەند و نیگاركێش، پرسیارێكی زۆری دروستكردووە لەنێو كۆمەڵگەدا! ئەو پیاوە بۆ ملی لە نیگاركێشان ناوە؟ شێت بووە یان خۆی شێت دەكات؟ بیرو ئەندێشەكانی ئەوەندە زۆرن كەف دەكەن؟ بە چیرۆك، شیعر خوێندنەوەو لێدوانی تەلەڤزیۆنەكان تینوێتی نەشكا؟ كاكە، هەبێ و نەبێ پارتێك دەیجولێنێ!
وێژەكارانی كورد زۆرن كە نیگاریان كێشاوە لە شەرەفخانی بەدلیسی تاوەكو ئەمین زەكی بەگ، حوسێن حوزنی موكریانی، عومەر عەلی ئەمین، نوری شێخ ساڵح ، حەمە موكری ، عەبدولڵا سەڕاج ، خەسرەو جاف و سمكۆ ناكام. فەرهاد پیرباڵ دیارترینیانە لەوڕۆكەدا.
خەڵكێكی زۆر ناسیاو نەناسیاو راگەیاندنەكانیش راستەوخۆ پرسیاریان ئاراستە كردووم دەربارەی ئەو كار و جموجۆڵەی پیربال، بەڵام بێدەنگیم هەڵبژاردووە. ئێستا كاتی شكاندنی بێدەنگیمە. چی راست و رەوان بێ لە تێگەیشتنم لە دنیای هونەری شێوەكاری بەبوارە مێژوووییەكەی و چیرۆكی هونەری دونیا و كوردستان، بە وەرگرتنی نموونەی فەرهاد پیرباڵ دەیخەمەڕوو بەوئومێدەی كاك فەرهاد نیگەران نەبێت و جەماوەریش خۆی بە هۆشمەندتر و كەسایەتی خۆی لەو مرۆڤە بەرزترو پاكتر نەبینێت، كە ئەوە رەفتاری جەماوەربووە بەرامبەر كەسانی پێشەنگ.
ئەو شێوازەی ئەو نیگاری پێدەكێشێت یەك سەدە لەمەوبەر لە ئەوروپا كاری پێكراوە گفتوكۆی لەسەر كراوە، وەك قوتابخانەی هونەری ئەبستراكت ناسراوە و چەند بەشی لێبووەتەوەو چەند رێبازی هونەری بە ناوی (هونەری مۆدێرنە)، (پۆست مۆدێرنە) هاتنە مەیدان و كۆن بوون، شێوازی دەربڕینی دیكە هاتووەتە ئاراوە بە كاری ڤیدیۆی هونەری كورت و شێوازی ئستلیشن و كاری راستەوخۆ لە كەرستە و لە سروشت و تێكدان و شێواندن بە نموونەی كاری (هێرمان نیتشە) و كەوڵكردنی مانگا و پارچەپارچەكردنی و گەوزاندنی مرۆڤ لە خوێندا.
لەبەرئەوەی لە كوردستان رۆشنبیری شێوەكاری ئەوەندە نزمە تەنانەت زۆر لە شاعیر، چیرۆكنووس، هونەرمەند و رۆژنامەنووسان ناتوانن زانیارییەكی كورت باسبكەن لەسەر مێژوو و تێگەیشتنیان و چێژ وەرگرتنیان لە هونەری شێوەكاری ، هەر بۆیە شارەزاترین كەسانی نووسەر و رەخنەگر و شیكاری بواری شێوەكاری ئێمەی شێوەكارانین.
ئەگەر لە ناوچەكە خەڵكی دیكە لە مەیدانەكە هەبێت ، من ئەو وتارەم نەدەنووسی. یەكەم كتێبیش دەربارەی رێچكەی ئەو هونەرە نووسرابێ كتێبەكەی فەرهاد پیرباڵە (مێژووی هونەری شێوەكاری لە كوردستاندا)، كە توانیویەتی خزمەتێكی جوان پێشكەش بەو هونەرە بكات. ئەو هەر لە سەرەتای دەركەوتنی لە ساڵی 1994 لە فەرەنسا گەڕایەوە، كۆواری (وێران)ی دەردەكرد ، بابەتی شێوەكاری زۆرترین رووپۆشی كۆوارەكەی گرتبوو بە نووسین و وێنەوە.
مێژوووی ئەو هونەرە زۆر تازەیە و شتێكی وا نهێنی تێدا نییە لێمان شاراوە بێ. هەر وەك نووسین بە كوردی لە شیعر و چیرۆك زۆر تازەیە، بە بەراوردی مێژووی نووسین وێژە لە یۆنان و ئیتاڵیاوە لە دانتییەوە تاوەكو شكسپیر.
وەك مەسعود محەممەدی بیرمەندی گەورەی كورد دەڵێ "بەر لە حەفتا بۆ نەوەت ساڵێك دەبێت نووسین بە كوردی لێرەو لەوێ لە شاری سلێمانی و كۆیە دەستی پێكردووە" ، كەواتە نیگاركێشان دوێنی دەستی پێكردووە.
وشەكانم بە رەق وەرمەگرن ، نزیكەی 30 ساڵ بەر لە فەرهاد پیرباڵ بەوشێوازە نیگاریان كێشاوە لە سلێمانی و هەولێر، پەنچا ساڵیش بەر ئێستا لە بەغدا بە شێوازی ئەبستراكتی ئاواز و فۆرمی و ئەبستراكتی گوزارشتی نیگاریان كێشاوە لە پێش هەموویانەوە شاكر ئالسەعیدە.
ئێستا لە كوردستان نیوەی شێوەكاران بەشێوازی ئەبستراكت نیگار دەكێشن تەنانەت لە چوار بەشی شێوەكاران بەشێكیان شێوازی نیگاركێشان بە رەنگ و فلچە رەتدەكەنەوە بە گوزاشتی كلاسیك ناوی دەبەن. ئایا شێوازی نوێتر هەیە وەك گیدۆ ئارت ئەستلیشن و ئەوان شێوازی دیكەیان گرتووە وەك ئەو بزاوەی حەفتا ساڵێكە لە دونیا بووەتە هۆی دەربڕین.
تابلۆكانی فەرهاد كە خەڵك تێناگات و تێدەگات بووەتە كێشەی بێ مانایی و واتە . خۆ سەدان شێوەكاری كوردی دیكەش و هەزاران و ملیۆنانی دیكە كە پەراوەی هونەر دەكەن هەر تێیانناگەین و نەبووەتە كێشەی هزر و پچڕانی زنجیرەی ئەندێشەو ژیان و كوردایەتیان، زۆر لە جەماوەری كورد بۆ تابلۆ و پەیكەری واقیعییە خواستی پێدانی زانیارییە و پرسیار دەكات لە پۆرترێتێك و گوڵێك و سروشتێك كە تێیناگات لە شێوازی سریالی و گوزارشتی ، یەك لەسەر یەك داوای روونكردنەوەمان لێدەكرێت . كە ئەو جۆرە تێنەگەیشتنانە گرنگییان لەوەدایە جەماوەر بخەیتە خەیاڵ و ئەندێشەی بابەتەكەتەوە ، گرنگ نییە لە پاشان لەو گەڕانە بماندۆزێتەوە. یان چێژی لێبكات، هونەرمەندیش چێژ لەو تێنەگەیشتنەی جەماوەر دەبینێت . كەواتە ئێمە چیمان بەنهێنی بۆ حیكمەتی هونەرەكە هێشتەوە، ئەی نەمانتوانی وابكەین بیركردنەوەی بینەر بجوڵێنم و تێگەیشتنی چەندان كاژێری دوابخەین و بیری تیژ بكەینەوە؟ ئەو لە خۆمان زیاتر بیخەینە قوڵایی كارە هونەرییەكە.
ئەگەر بەشێكی باش لە بینەر و جەماوەری كورد ئاشنای هونەری شێوەكاری بوونایە، كارەكانی پیرباڵ ئەوەنین كە تووشی پرسیار و ناتێگەیشتن بن و تاوان و هۆكاری تێنەگەیشتن بۆ شێوەكار بگێڕنەوە، یان ئەوە كەسایەتییەكەیەتی سەرلێشێواوی خوڵقاندووە؟
كەواتە پیرباڵ كارەكتەرێكی بەهێزە و سەركەوتووە لە نواندنی رۆڵدا جا بە نیگاركێشان بێت یان شیعر خوێندنەوە، ئەو پشت بە دیكۆمینتی كاركردنەكەی دەبەستێت بە فۆتۆبێ، یان بە ڤیدیۆ تاوەكو ئەو هێز و خێرایی بڵاوبوونەوەیە بگەیێنێتە ناو جەماوەر و كۆد دوای كۆدی یوتوب بشكێنێت. كە مافی ئاسایی خۆیەتی ئەو وەك شاعیر و نیگاركێش تاكە كەسە لەوبوارە توانیبێتی زۆرترین خەڵكی ئاسایی و رۆشنبیر والێبكات زۆرترین كلیكی لە سایت و پەیج و یوتوب و فایلی مۆبیل و تەنانەت لەكاتی نیگاركێشانیش حەشامەتێك لە دەوریەتی، كاك فەرهاد خۆشی زۆر بەو كەشە خۆشحاڵە و هێز و وزەی لێوەردەگرێت ، بە جارێك وەك دەروێش حاڵ دەیگرێت و زێدەڕۆییش دەنوێنێ وەك خۆی كەسایەتییە دادائی و سریالییەكانی ساڵانی سی و چلەكانی سەدەی رابردوو، ساڵانی هەشتاكان و تاوەكو 1993ێش من لە كەسایەتی ئەو دەچووم كە سەركێشییەكانم كەمتر نەبوون، بەڵام ئەوكات نە ئینتەرنێت و نە میدیای وا هەبوو، كە هەموو خەڵك دەستی پێبگات.
لە سەرەتای مانگی سێی ئەمساڵ بوو، كاژێر 9ی شەو بوو، شەوێكی زۆر ساردبوو، پیرباڵ بە مۆبایل ئاگاداری كردمەوە كە دەیەوێ نیگار بكێشێ لەبەردەم زانكۆی ئەمریكی لە سلێمانی، منیش چووم، ئەو بەو شەوە كەشێكی هونەری وای دروستكردبوو لە دەستپێكرنی شانۆیەك دەچوو خۆی كارەكتەری سەرەكی بێ و خۆشی هەر دەرهێنەربێ و ئێمە مانانیش لە هاوڕێ و رێبوارانی ناو زانكۆكە، شۆفێری تاكسی، ئاسایش، پۆلیس و
خەڵكی شاران و گەرەكچیان بووینە بینەر و ئەكتەر و كۆمبارس. ئەوە پەیام و هونەری پۆست مۆدێرنە، ئەوە بەشێكە لە پەراوەی و نواندن و نمایشی هونەری مۆدێرن لە دونیا.
تاوەكو ئێرە ئەوە خۆ نمایشكردن و كاری شێوەكارێكی كوردی وەك فەرهاد پیرباڵە، زۆریش وشەی (تەحەدا) بەكاردێنێ لە بەرامبەر نیگاركێشان و خەڵكی گێل و تەنانەت هەندێجار بەرامبەر بە سیاسەتڤانانیش.
ئەوەی پیرباڵ لە نواندنی شیعر و نیگاركێشان بە بەرهەم و نواندنەكانییەوە تازە نییە و زۆر كۆنە و لە سییەكانی سەدەی بیستەم دادائییەكان و سریالییەكان، زۆر كاری نەشیاویان كردووە كە لەنێو كۆمەڵگەیەكەیان نائاسایی و ناڕەوشتی بووە.
رەفتاری شێتانەی سلفادۆر دالی
ئەو جوڵە شێتانەیە تائێستا كە بەردەوامە لە وڵاتە پێشكەوتووەكان لە پێشانگەكاندا هەیە هونەرمەند دەچێ یەك شەپلە گو لەناو هۆڵەكە لەبەرچاوی ئامادەبووان دەكات و بەبێ ئەوەی خۆی شلوێ بكات دەڕوات و هەرایەك دەنێتەوە.
لە ساڵانی چلەكاندا سلفادۆر دالی زۆر رەفتاری نائاسایی و شێتانەی لە ئیسپانیا كرد، تاوەكو سەرنجی زیاتر و خۆ نمایشێكی جیاوازتر بكات بە رۆبێكی حەمامەوە دێتە بازاڕ و خۆی هەراج دەكات و نرخ لەسەر خۆی دادەنێت، بەڵام كەس نایكڕێت.
پیكاسۆ لەسەر قەراخ دەریا لەسەر پشت و شوێنی سكی خەڵكی رووت و گەشتیار چەندان سكێچی كردووە
زۆر لە هونەرمەندان كار و شارەزای و توانای ئەكادیمیان نەبووەتە نێوبانگیان، بەڵكو رەفتاری نائاسایی و خۆیان كارەكتەرێكی درامی یان كۆمیدی بەهێزبوون، ئەو هێزە نادیارەی دەسەڵاتی دەوڵەت و مافیا ئەوەندە كاریگەر نەبووە تاوەكو بیناسێنی و هەلیترۆقێنێ، هەرچەندە نابێ مەبەستی دەزگاكان فەرامۆش بكەین بۆ گەورەكردنی كەسایەتێكی سیاسی یان هونەری.
خۆ زۆر نووسەر هونەرمەند هەیە هەر لە گوڵی سەرمێزی پیاوانی دەسەڵات دەچن، بەڵام واناسراو خۆشەویست و لەبەر رقی تێنەگەیشتنی جەماوەر نین.
كەی كێشەی فەرهادە خەڵك بە راست و چەپ تێیبگات، پاشان كێ دەتوانی بڵێ فەرهاد خۆی لە هونەرەكەی و كردارەكانی خۆی تێدەگات، بەڵام ئەو لە ناخەوە دەكوڵێ و هەڵچوونێكی زۆر بە تینی تێدا كۆبووەتەوە، نە شیعر نە چیرۆك نە گۆرانی دنیا داینامركێنێتەوە لە نیگاركێشان زیاتر، خۆ لەوانەیە خۆشی سەری لە خۆی سوڕمابێ بۆ بەوشێوەیە بە رەنگ و هێڵەوە نووساوە !
ئەو شێوەكار نییە، بەڵام دەیەوێ ببێتە شێوەكار و پاشان بە هونەرمەندێكی دیار و داهێنەر خۆی بسەپێنی. زۆر لە خۆكردنێكی نائاسایی بە كرداری نیگاركێشانی ئەوەوە دیارە و خۆی زۆر ئازار دەدات و نواندن و هەراو میدیایەكی زۆر دەورووژێنێت، كە لە راستیدا زۆر لە شاكارەكانی دونیا لە ژوورێكی بچووكی تاریك و دوور لە چاوی خەڵك بەرهەم هاتوون ، مەبەستم نییە بڵێم ئەو شێوازەی ئەو نامەعقولە و هونەری نییە، نەخێر هونەرییەو پڕە لە جورئەت و چاونەترسی و سەرنجڕاكێشان. كارەكانی ئەو هونەرێكی بەرز و پڕ لە ماناو فۆرمی تازە و نێوەڕۆكی نەتەوەیی و ئەكادیمی و بابەتی تێدا نییە ، بەقەد ئەوەی هەڵچوونێكی سۆزداری و خودی و گیانین ، كە ئەوەش سەرچاوەی هەوێنی گوزارشتن بۆ هونەرێكی ئەبستراكت . كە كارەكانی ئەو ئەبستراكتی ئەندازەیی نین ، ئەبستراكتی ئاوازین و هەندێجار ڤیوگەر دەكێشێ و دەبێتە ئەبستراكتی گوزارشتی، لەشێوازی كاری ئەرشیل گورگی و میرۆ و كاندنسكی دەچن ، واشی بۆ دەچم لەژێر كاریگەری ئەوان دابێت. ئەو كارانەی ئەو پڕن لە هێڵی چەماوە و نیوە خڕ و لولاوی و سوود لە یەك رووبەری تەختی ماتریالەكە وەردەگرێت زۆر نە شارەزاییانە رەنگ دادەنێ و نازانێ فلچە بگرێت و شارەزاییەكی سەرەتایشی نییە لەسەر تەكنەلۆجیای رەنگ و كانفاس و كەرستەكان، هێزی رەنگ و تەمەندرێژی كەرستەكان .
تابلۆ و رەنگ و زۆر شتی دیكەی نیگاركێشانی ئەو لە منداڵێك و شێتێك دەچن ، كە زۆربەمان لە كاتی دوور لە چاوی كەسانی دیكە ئەو دوو خاسیەتەمان تێدایە كە نیگار دەكێشم لە منداڵ منداڵتر و لە شێت شێتر و ترسنۆك و وەك مردووم.
كاتێك كارەكانی ئەو لەڕووی ئەكادیمییەوە هەڵسەنگێنین لاوازن و هیچ پەیوەندییان بەهونەری نیگاركێشانی ئەكادیمی یان ئیمریشینزم و ئەوانیدیكەش نییە، تەنیا ئەبستراكتی (رووت و پەت)ی ستۆدیۆ نەبێ ، كەچی ئەو بەرامبەر بە سرووشتیش دابنیشێ هەر خەیاڵی خۆی بە سوریالی و رووت و پەتی دەكێشێت.
نیگاركێك بەئاستی نزم كێشرابێ مانای ئەوەنییە ئەو كارانە دوورن لە هەستی مرۆڤانە و هەڵچوونی كەسێكی پڕ لە ئازاری خێزان و خود و میللەت و گرێی كەسایەتی و كۆمەڵگەیەكی پاشكەوتوو . شاكارە هونەرییەكان لە هونەری شێوەكاری هەر بریتی نین لە كاری داهێنانی یەك شێوەكار و یەك وڵات و یەك شێواز و یەك مرۆڤ.
كاتێك سەیری فەرهەنگێكی هونەری شێوەكاری دونیا دەكەین چەندان كار لە تەنیشت یەك دەبینین كە لە یەك سەردەم بەرهەم هاتوون و هونەرمەندەكان سووكایەتیان بە كاری یەكتری كردووە، خەڵكیش بەشداری ئەو بەعەرزدادانەی كردووە، كەچی پاشان هەردووكیان بوونەتە بەشێك لە داهێنانی سەرجەم مرۆڤایەتی.
ئەو زۆر زوو نیگاركێشانی خۆی هێنایە سەر شەقام و دیواری دەزگاكان ، ئەو زانیارییە رۆشنبیرییە شێوەكارییەی ئەو هەیەتی لەسەر مێژووی بزاوی هونەری شێوەكاری بەگشتی وایكردووە بەهۆی خۆخۆشەویستكردن بە هونەری سەر شەقام تێكەڵبوون بە خالك و بینەر بكاتە بەشێك لە كرداری سەرەتا و كۆتایی كارێك و دروستكردنی چیرۆك بۆ تابلۆیەك تاوەكو بە داهێنان و شاكار لێیبڕوانین.
بۆ ئەوەی بتوانی ئەو كێڵگە هێمنە و پڕ لە ئسولییە تێكبشكێنێ، جلی رۆژانەی خۆی لە رەنگ دەگرێت و گوێ بە سەرما و خەڵكیش نەدات كە شەڕفرۆشانە هاتن بە نووكە شەق خستیان و خەریكبوو تابلۆكەی و خۆی ببنە قوربانی، ئەوە هەندێ لە خەڵك و جەماوەری كوردن . ئەوەش زۆرینەی خەڵكی كوردن هەوڵدەدەن دێنە پێش تاوەكو وێنەیەكی لەگەڵ بگرن.
"پیرمێرد هەڵنەهات لۆ بەغدا"
حەسەن زیرەك دراوەتە بەر شەق لە سلێمانی، بەغدا، خانەقین، هەولێر و كرماشان ، خانێ و تاران و ماران و واران . لە هەمووشی خەڵاتكراوە. حاجی قادر ملی لە دۆلی باڵەكایەتی نا، لە ئیستەنبۆل شارەزابوو؟ پیرەمیرد هەڵنەهات لۆ بەغدا! سەید عەلی ئەسغەری كوردستانی هەڵنەهات لۆ هەورامان! عەزیز سەلیم لەوبەر بۆ ئەوبەر هەڵنەهات! بێكەس لە ترسی تانەی خەڵك زۆرترین كات لە ژوورەوە نەبووە! ئەحەی خولەسنەیی زۆرترین كات سەر و ملی خوێناوی نەبووە! شەریف پاشا لە بێكەسی و برسیەتی لە میترۆ ساردەكانی پاریس نەمردووە! ئەحلام مەنسوور لە بێكەسی و فەرامۆشیدا نەمرد!.
فەرهاد و نموونەی فەرهادەكان لەو كۆمەڵگەیە هەروا بە بێكەسی دەمرن و بەناوزڕاندن، شێت، ئاژاوەگێڕ ، بەكرێگیراو ، سەرخۆش ، بێڕەوشت ، شارچێتی و شتی دیكە تاوانبار دەكرێن . كە ئەوانەش بەشێكن بۆ بەرزكردنەوەی ناوی كەسایەتییەكە. ئەوەی دەبێ نەیشارمەوەو بەڕوونی لەسەر ئەو هاوڕێیەم و جەماوەرەكەشم بێژم. نە فەرهاد شێوەكارێكی ئەوندە پێشكەووتو و ئەكادیمی و قووڵە ، نە جەماوەری كوردستانیش ئەوەندە پڕن لە سەرخان و ژێرخانی رۆشنبیری هاوچەرخ.
ئەو ناتوانێ رەوتی هونەری شێوەكاری كوردی بگۆڕێت ، كە خۆی دەڵێ سەراوژێری دەكات ، چونكە دونیا واگۆڕاوە. رۆژگاری سەد ساڵ و رۆژگاری پیكاسۆ نەماوە كەسایەتی تاك دروستبێ بۆ سەدەیەك و بیست ساڵ بلیمەتی هەڵكەوتوو لەسەر تەختی شانۆ بێت. لەو رۆژگارە هەر چوار بۆ شەش ساڵ بیر و هونەری بلیمەتێك بڕدەكات، پاشان هونەرمەندی كورد نابێ ببێتە جیهانی، چونكە خەڵك پێیناخۆشە، مەلا پێیناخۆشە، ئەوروپا و ئەمریكا پێیانناخۆشە، شكاندنی سنوور بڤەیە كاكی برا و خوشكی ئازیز.
ئەوروپا و ئەمریكا 25 ساڵ بەر لە ئێستا گازی كیمیاییان بە ئێمەدا نەكرد! ئێستاكەش كاریان تێكشكاندنی كەسایەتی كولتووری و دیاری میللەتی بێ ناسنامەكانە، فەرهاد پیرباڵ كێیە؟ چییە؟ تاوەكو كوێ بڕدەكات؟ بەنزینی تاوەكو كوێ پێیە؟ ماڵیان لە كوێیە؟ شێتی كام كیشوەرە؟ رەگەزی كوردە یان جوە یا.....؟ لە كون و كەلەبەری هەولێرێ یان لەبن قەڵاتێ ، یان لە یوتوب بۆ فەرهاد دەگەڕێن تاوەكو تابلۆكانی كڕین و فرۆشتنی پێوە بكەن لە بۆرسەكانی دنیا؟ ئەمریكا و ئەوروپا لە كوردستان لە نەوت دەگەڕێن نەك هونەر و كولتوور، نەك فەرهاد و شیرین.