لە فێستیڤاڵێکدا لە شارباژێڕ 13 کورتە فیلمی پەروەردەیی نمایش کران

 

شوێنەکە هۆڵی نمایشە لە قەزای چوارتا، 13 کورتە فیلم لە چوارچێوەی "فێستیڤاڵی کورتە فیلمی پەروەردەیی شارباژێڕ" کە بەرهەمی مامۆستا و خوێندکارانی قوتابخانەکانی سنووری قەزای شارباژێڕن نمایش دەکرێت.

 

لەتیف حوسێن، بەڕێوەبەری پەروەردەی شارباژێر بە رووداوی گوت: "لە راستیدا سەرەتا ئەم بیرۆکەیە بۆ ئێمە قورس بوو، چونکە ئێمە نە ئەکتەرین نە سینەماکارین، بەڵام توانیمان لە رێگەی مامۆستایانی هونەرەوە بەشێک لە مامۆستا و خوێندکارەکان رابهێنین کە بەشداربن لە بەرهەمهێنانی ئەو کورتە فیلمانەدا." 

 

مامۆستا و خوێندکارێک کە لە دوو کورتە فیلمی جیاواز بەشدارییان کردووە، دەڵێن کارەکەیان نوێ و جیاواز بووە.

 

رێبین ساماڵ، سەرپەرشتیاری پەروەردەییە و ئەکتەری یەکێک لە کورتە فیلمەکانە، بە رووداوی گوت: "ئەو بابەتەی من فیلمم لەسەر کردووە، بابەتێکی مێژووییە و مێژووش بەشێکە لە پەروەردە، بە حوکمی ئەوەی کە فێستیڤاڵەکە لە شارباژێڕە بە گرنگمان زانی کە کورتە فیلمەکە لەسەر مێژوویی شارباژێڕ بێت." 

 

یەحیا رێباز، خوێندکاری پۆلی دوو بنەڕەتییە و لەبارەی کورتە فیلمەکەیەوە گوتی: "من لە کورتە فیلمێک بەشداریم کردووە بەناوی فلاش و باس لە ئاژەڵدۆستی دەکات و خۆشحاڵم کە کارەکەم لێرە نمایش کرا." 

 

ئەرینا خەڵکی ناحیەی خانەسووری شنگالە، ئەو لە منداڵییەوە لە شارباژێڕ ژیاوە و ئێستاش خوێندکاری بنەڕەتییە، ئەو لە کورتە فیلمێک لەبارەی ژیانی ئێزدییەکان بەشداربووە.

 

ئەینوس عیسا، خوێندکارێکی کوردی ئێزدییە و گوتی: "کورتە فیلمەکەی من ناوی شەڕ و پەنابەرە، باس لەوە دەکات کە ئێمە دەگەڕێینەوە بۆ جێگەی خۆمان و لەوێ دڵخۆشتر دەبین، هەروەها لەنێو خەڵک و ئاینزا و شوێنی خۆماندا دەبین." 

 

ژمارەیەک هونەرمەندی دیاری کوردستان هەڵسەنگاندنیان بۆ بەرهەمە هونەرییەکان کردووە و وەزارەتی پەروەردەش خەڵاتی براوەکان دەکات

 

د. ئالان حەمە سەعید، وەزیری پەروەردەی هەرێمی کوردستان بە رووداوی راگەیاند: "زۆرجار بە ئێمە دەڵێن وەزارەتی پەروەردە تەنها خەریکی فێرکردنە و وازی لە پەروەردە هێناوە، بەڵام لە راستیدا وانییە، ئەوەتا بەهۆی هاوکارییەکانی ئێمەوە ئەم مامۆستا و خوێندکارانە 13 کورتە فیلمیان بەرهەمهێناوە و هەمووشیان پەیامی زۆر باش و جیاوازیان هەڵگرتووە." 

 

نمایشی کورتە فیلمەکان دوو رۆژ بەردەوام دەبێت، وەزارەتی پەروەردە دەیەوێت بۆ ساڵی داهاتوو فیستڤاڵەکە فراوانتر بکات بۆ سەر ئاستی پارێزگاکانی هەرێمی کوردستان.