نهێنیی 'تاجی ژیان'ـی بەشداربووە سەرکەوتووەکانی ئەنتیتۆباکۆ بزانە

 

تاجەکە لەسەری نووسراوە ''ژیان''، لەبەر ئەوەی هەر بەشداربوویەکی پڕۆژەکە کە سەرکەوتوو بووە لە وازهێنان لە جگەرە، نێرگەلە و ڤەیپ و بە تەواوی جەستەی پاکبووەتەوە لە تووتن، ژیانی پێبەخشراوەتەوە و رزگار بووە لە مەرگ و ناڕێکیی و زیانگەیاندن بە ئەندامەکانی جەستەی.

 

تاجی ژیان واتا تاجی گەڕانەوەی ژیانی تەندروست و ژیانێکی دوور لە تووتن و بەرهەمەکانی.

 

زولەیخا محەممەد، خانمە بەشداربوویەکی ئەنتیتۆباکۆیە و تاجەکەی لەسەرە، تەمەنی نزیکەی 60 ساڵ دەبێت و دەڵێت: لە 15 ساڵییەوە جگەرە دەکێشم و لەوەتەی وازم لێی هێناوە، خەو و هەناسەدانم باش بووە.

 

لە دهۆکەوە بەشداربوویەک هاتووە کە 39 ساڵە جگەرە دەکێشێت و بە پڕۆژەی ئەنتیتۆباکۆی ئەمساڵ بە تەواوی وازی لێهێنا.

 

خانمە بەشداربوویەکی دیکە خەڵکی رۆژهەڵاتی کوردستانە و گوتی، ''پێشتر سەرئێشەی زۆرم هەبوو و خەوم باش نەبوو، بەڵام ئێستا ئەوانەم نەماون''.

 

بەشداربوویەکی دیکە پیاوێکی 73 ساڵانە و ئاشکرای دەکات، 50 ساڵە جگەرە دەکێشێت، ئێستا بە ئەنتیتۆباکۆ وازی هێناوە و ئێستا هەست بە ژیانێکی خۆش دەکات.

 

محەممەد عەبدولستار لە شەقڵاوەوە بەشداربووە و 31ـی 5 کە رۆژی جیهانی بەرەنگاربوونەوەی تووتنە، رۆژی لەدایکبوونیشیەتی، ئەو دەڵێت، ''جگەرەکێشان تووشی هەستیاری و کۆکەی بەردەوامی کردم، بەڵام ئەمساڵ توانیم وازی لێبهێنم و کۆکەکەم نەماوە''.

 

مێردمنداڵێک بەشداربووە کە تەمەنی 14 ساڵە و دەڵێت: 6 ساڵە جگەرە دەکێشێت، بەڵام بە تەواوی لەگەڵ ئەنتیتۆباکۆ وازی لێهێنا.