پزیشکانی گشتیی دانەمەزراو گردبوونەوە؛ ''10 مانگ چاوەڕوانی بەسە''

 

ئەمڕۆ یەکشەممە 3-5-2026 پزیشکانی گشتیی دانەمەزراو لەبەردەم وەزارەتی تەندروستیی هەرێمی کوردستان و بەڕێوەبەرایەتیی گشتیی تەندروستیی سلێمانی گردبوونەوە و بە سەتانیان رژانە سەر شەقامەکان؛ نوێنەرێکیان دەڵێت: تائێستا هیچ هەواڵێک لەبارەی دامەزراندنمانەوە نییە.

 

دکتۆر داستان بەشارەتی، نوێنەرێکی پزیشکانی گشتیی دانەمەزراو لە سلێمانی رایدەگەیێنێت، دامەزراندنی پزیشکانی گەنج بناخەی سەرەکیی پلەبەندیی پزیشکی و نەخۆشخانەکانە. 

 

هاوکات د. بڵند شکور، نوێنەرێکی پزیشکانی گشتیی دانەمەزراوە لە هەولێر و گوتی، ''هیچ وەڵامێکی یەکلاکەرەوەمان لەلایەنی بەرپرس بەدەست نەگەیشتووە و هەموو لایەک لە ئاستی دامەزراندنمان بێدەنگن''.

 

هەر لەنێو خۆپێشاندەراندا د. فاتیح سەنگاوی، ئەندامی پەرلەمانی کوردستان گوتی: لە پەرلەمانەوە پاڵپشتیانین و داوام لە وەزیری تەندروستی کردووە، بە خێرایی بەدەم داواکارییەکانی پزیشکانی گشتییەوە بێت.

 

 

بەگوێرەی بەدواداچوونەکانی رووداو، حەوت زانکۆ لە هەرێمی کوردستان بەشی پزیشکیی گشتییان هەیە و ساڵی 2024، 778 پزیشکیان پێگەیاندووە و دەرچوون کە هەموویان دوای ساڵێک دامەزران؛ ساڵی رابردووش 663 پزیشک دەرچوون و تائێستا هیچیان دانەمەزراون.

 

روونکردنەوە؛ هەر خوێندکارێکی پزیشکیی گشتی کە کۆلێژ تەواو دەکات، دوو ساڵ وەکو پزیشکی نیشتەجێی خولاو لە نەخۆشخانە گشتی و فریاکەوتنەکان دەوام دەکات، پاشان دەبێتە پزیشكی پلەبەند و یەک ساڵ لە بنکە و مەڵبەندە تەندروستییەکان دەوام دەکات، پاشانیش نازناوەکەی دەگۆڕێت بۆ پزیشکی شارەزای گشتی و دواتریش پزیشکی پایەبڵند. بەڵام مەرجی سەرەکی ئەوەیە لەگەڵ هەر بەرزکردنەوەی ناونیشانێک شوێنەکەشیان بگۆڕێت و ئێستا لەبەر ئەوەی پزیشکانی دەرچووی 2025 دانەمەزراون، ئەوا پزیشکانی خولاو ناتوانن پلەیان بەرز بکرێتەوە، چونکە کەس نییە شوێنیان بگرێتەوە.