پسپۆڕێکی کورد لەنێو تیمی داهێنەرانی زانکۆی ئۆسلۆیە بۆ ئامێرێکی پزیشكی و خەڵات دەکرێت

 

ئالان سامڕەند، هاونیشتمانیی رۆژهەڵاتی کوردستانە و پسپۆڕی جێنەتیکە لە نەرویج، بە رووداوی راگەیاند، لەگەڵ تیمێکی زانکۆی ئۆسلۆ خەریکی دروستکردنی ئامێرێکن بۆ پێوانەی مادەی لاکتەیت کە لە ئەنجامی وەرزشی چڕ و نەخۆشییەکی دڵ رێژەکەی لە جەستەدا زیاد دەبێت.

 

بەگوتەی ئالان سامڕەند، داهێنانەکەیان لە ئاستی کردەیی نێو تاقیگە سەرکەوتوو بووە و بەرنامەڕێژیی تەواوی بۆ کراوە بۆ ئەوەی ببێت بە ئامێر، بەڵام چاوەڕێی سپۆنسەری گونجاو دەکەن لە بەریتانیا، ئەڵمانیا و نەرویج.

 

ئالان سامڕەند دەڵێت: ئەو ئامێرە لە باسک دەبەسترێت، لەڕێگەی ئارەقەی ژێرپێستەوە پێوانەی لاکتەیت دەکات و لەڕێگەی کاتژمێرێکەوە ئەنجامەکە دیار دەکات، بۆ ئەوەی لەکاتی وەرزشدا رێژەی ئەو مادەیە بزاندرێت و چاودێریی بکرێت، چونکە لەکاتی بەرزبوونەوەیدا، پێویستە کەسەکە لە وەرزش بوەستێت و پشوو بدات، تاوەکو زیان بە ماسوولکەکانی نەگات.

 

هەروەها بۆ زوو دەستنیشانکردنی نەخۆشییەکانی دڵیش گوتی، ئەگەر ئەو مادەیە بەرز ببێتەوە ئەوا نیشاندەری ئەوەیە ماسوولکەکانی دڵ تووشی شکست بوون و ئەگەری تووشبوون بە جەڵتە زۆرە.

 

لە کۆتاییدا ئەو پسپۆڕە کوردە گوتی، تیمەکەیان لە نۆ کەسی پسپۆڕی زانکۆی ئۆسلۆ پێکدێت و چاوەڕێی سپۆنسەرن بۆ ئەوەی کارەکەیان بکەن بە ئامێرێک و بەرهەمی بهێنن.

 

لەبارەی خەڵاتەکەیەوە ئاماژە بەوەدەکات، تیمەکەیان لەلایەن کۆمەڵگەی سێنسەتیک بایۆلۆژیی فەرەنسییەوە خەڵاتی زێڕینی لە رێوڕەسمی International Genetically Engineered Machine لە پاریس وەرگرت.

 

 

1- هەوکردنی خوێن

2- نەخۆشییەکانی ماسوولکەی دڵ

3- وەرزشی تووند و چڕ

4- نەخۆشییەکانی جگەر

5- کاریگەریی لاوەکیی هەندێک دەرمان

6- هەندێک نەخۆشیی جێنەتیکی