د. عەتیە حەمەسەعید بۆ ئەو خانمانەی شیری قوتوو بە منداڵیان دەدەن: تووشی شەکرەیان دەکەن

 

پڕۆفیسۆر عەتیە حەمەسەعید، پسپۆڕی نەخۆشی و نەشتەرگەرییەکانی خانمان و منداڵبوون رایدەگەیێنێت: زۆرجار منداڵ خستنەنێو شووشە لەدوای لەدایکبوون پێویست نییە و بۆ ئەوەش بەسەرهاتێک دەگێڕێتەوە کە خۆی منداڵێکی تەندروستی لەنێو سکی دایکیدا دەرهێناوە، بەڵام بە داوای پزیشکێکی دیکە، خستوویانەتە نێوشووشە و گیانی لەدەستداوە.

 

بەگوتەی پڕۆفیسۆر عەتیە حەمەسەعید، نەشتەرگەریی منداڵبوون شیری دایک کەم دەکاتەوە و کۆرپە بێبەش دەکات لە شیرپێدانی سرووشتی.

 

لەبارەی شیری قوتووەوە هۆشداری دەداتە دایکان و گوتی، ''شیری قوتوو کار لە خانەی پەنکریاسی منداڵ دەکات و ناهێڵێت ئەنسۆلین دروست بکات، بەمەش منداڵەکە هەر لە منداڵییەوە تووشی شەکرە دەبێت''، هەروەها شیری دایک پاکە و چەندان مادەی تێدایە کە لە شیری قوتوودا نییە.

 

ئەنسۆلین: هۆرمۆنێکە لە پەنکریاس بەرهەمدێت و فەرمانی هاوسەنگکردنی شەکری خوێنە، بە نەبوونی یاخود کەم دەردانی؛ کەسەکە شەکری خوێنی بەرز دەبێتەوە و رەنگە تووشی شەکرە بێت.