لە کۆسۆڤۆ هۆشداری لە خراپ بەکارهێنانی دەرمانەکانی دژەقەڵەوی دەدرێت

 

لەو وڵاتە نزیکەی هەزار و 500 دەرمانخانەی تایبەت هەن، بەڵام تەنیا 20 چاودێریان هەیە بۆ کۆنتڕۆڵکردنی دەرمانە ساختە و بێکواڵیتییەکان.

 

د. مێریتا ئیمینی، سەرۆکی کلینیکی کوێرەڕژێنەکان لە پریستینا دەڵێت: ''ئێمە زانیاریمان لەسەر خراپ بەکارهێنانی ئەم دەرمانە لەلایەن دانیشتووانەوە هەبووە لەو کاتەوەی کە لە لیستی دەرمانە رێگەپێدراوەکاندا پشتڕاستکرایەوە و خرایە بازاڕەوە. لەم ماوەیەدا هەوڵمان داوە خەڵک ئاگادار بکەینەوە کە ئەم دەرمانە تەنیا مەبەست لێی بەرەنگاربوونەوەی قەڵەوی نییە".

 

بەپێی دەزگای خۆراک و دەرمان لە ئەمریکا، دەرمانەکانی دژەقەڵەوی سەرەتا بۆ نەخۆشیی شەکرەی جۆری دوو بەکاردەهاتن و ئێستاش بەو کەسانە دەدرێت کە نەخۆشیی شەکرە و دڵیان هەیە و قەڵەون، بەڵام نەزانین لە بەکارهێنانی، کێشە و نائومێدی دروست دەکات.

 

لولزیم رەحمانی، هاووڵاتییەکە کە پێشووتر دەرمانی دژەقەڵەوی بەکارهێناوە و ئێستا پەشیمانە ئەو دەڵێت: ''کێشەکە نائومێدییە، کاتێک شتێک بەکاردەهێنیت بە هیوایەکی زۆرەوە و کار ناکار، بێگومان پەشیمان دەبیتەوە؛ ئەو کاتیش کات و پارەت بەفیڕۆ داوە''.

 

بەپێی پەیمانگەی تەندروستیی نیشتمانی، 55٪ـی خەڵکی کۆسۆڤۆ قەڵەو و کێشزۆرن، بەشێکی زۆری ئەوانەش دەیانەوێت بەبێ هیچ ماندووبوونێک کێشیان ئاسایی بکەنەوە.

 

بەڵام پسپۆڕان دەڵێن، ئەو دەرمانانە چارەسەرێکی خێرا و جێگرەوە نین بۆ خۆراکی باش و وەرزشکردن، بۆیە پێویستە تەنیا لەژێر چاودێریی پزیشکدا بەکاربێن.