پزیشکێکی دەرمانساز بە هەموو شێوەیەک رەتی دەکاتەوە AI بۆ راوێژی پزیشكی بەکاربێت
رووداو - تەندروستی
پزیشکێکی دەرمانساز و شارەزای بواری ژیریی دەستکرد رایدەگەیێنێت، ژیریی دەستکرد لە وەڵامدانەوەی پرسیارە زانستی و پزیشکییەکان هێشتا جێگەی پزیشک ناگرێتەوە و نابێت پشتی پێ ببەسترێت.
ئەمڕۆ سێشەممە 10-6-2025 دکتۆر عەبدوڵڵا لوقمان، دەرمانساز و شارەزای AI لە بووڵتەنی تەندروستیدا گوتی، بەشێکی کۆمپانیاکانی ژیریی دەستکرد لە وەڵام دانەوەی ژیرییەکەیان ئەوەیان داناوە کە بەکارهێنەران بۆ پشتڕاستکردنەوەی زانیارییەکان پشت بە سەرچاوەی باوەڕپێکراو ببەستن.
دکتۆر عەبدوڵڵا لوقمان دەڵێت: هاونیشتمانییانی ئاسایی باشترە ژیریی دەستکرد بۆ پرسە گشتییەکان بەکاربهێنێت، نەک بۆ دەستنیشانکردنی دەرمان و جۆری نەخۆشییەکە.
زەکەریا سەلمان، قۆناخی دووی کۆلێژی ئەندازیاری بوو لە زانکۆی سەڵاحەدین، کەسوکارەکەی دەڵێن، هەستی بە ئازارێک کردووە و راوێژی بە ژیریی دەستکرد AI کردووە، ئەویش دەرمانێکی بۆ پێشنیاز کردووە. دوای خواردنی دەرمانەکە، زەکەریا تەندروستیی تێکچووە و دوای چەند کاژێرێک گیانی لەدەستدا.