پسپۆڕێکی کورد داوای بەسپۆنسەرکردنی دەرمانێکی دژەشێرپەنجەی دەکات

 

ئەمڕۆ یەکشەممە 11-5-2025 د. هەژمەت عەبدولخالق، مامۆستای کۆلێژی پزیشکیی گشتیی دهۆک لە بووڵتەنی تەندروستیدا رایگەیاند، "یەکەمجارە لەسەر ئاستی جیهان رووەکێک بە ناوی (Centrapalus paucifloris) ناسراو بە (CCF) دۆزراوەتەوە و لەسەر چەندین جۆری شێرپەنجە تاقیکراوەتەوە، دەرکەوتووە کە 95٪ـی خانەی شێرپەنجەی منداڵدان HPV-18 لەنێودەبات".

 

د. هەژمەت عەبدولخالق بۆ بەرەوپێشچوونی لێکۆڵینەوەکەی و ئەنجامەکانی داوای بەسپۆنسەربوونی دەکات لەلایەن کۆمپانیەیەکی دەرمانەوە، چونکە قۆناخی دووەمی توێژینەوەکەی ئەوەیە کە دەبێت ئەو رووەکە لە شێوەی دەرمانێک لەسەر مرۆڤ تاقیبکرێتەوە.

 

ئەو روونی دەکاتەوە، ئەو جۆرە رووەکە لە وڵاتی نەیجیریا و هەندێک وڵاتی ئاسیایی هەیە، بەڵام هێشتا لە هەرێمی کوردستان نەیدۆزیوەتەوە.

 

 

1- سەرەتا تاقیکردنەوە لەسەر ژمارەیەکی کەم مرۆڤ دەکرێت.

 

2- ئەگەر ئەنجامی باش نەبوو رادەگیرێت، ئەگەر ئەنجامی باشیشی هەبوو ژمارەکە زیاد دەکرێت.

 

3- ئەگەر ئەنجام باش نەبوو، هەوڵی زیاتری لەگەڵ دەدرێت، ئەگەر ئەنجامیش دیسان باش بوو ئەمجارە ژمارەیەکی زۆر بەرزی مرۆڤ بە پێوەر و ستانداردی تایبەت دەخرێنە نێو تاقیکردنەوەکانی توێژینەکەوە. 

 

پاشان بە چەندین فلتەری زانستیی ورد لە دامەزراوە پزیشکییە جیهانییەکان تێدەپەڕێت، ئەگەر لە هەموو تاقیکردنەوەکان دەرچوو، ئینجا بە رێکاری ورد و تایبەت رێگە بە بەرهەمهێنانی دەدرێت وەکو دەرمان.

 

بەشێوەیەکی گشتی هەر دەرمانێک 10 بۆ 30 ساڵی پێویستە تا دەگاتە قۆناخی بەرهەمهێنان.