بەڕێوەبەری تەندروستیی ئاکرێ: تووشبووانی جەڵتەی دڵ و مێشک رەوانەی دهۆک و هەولێر دەکەین

 

ئەمڕۆ پێنجشەممە 12-3-2026 د. سەروار موسڵیح، بەڕێوەبەری تەندروستیی ئاکرێ بە رووداوی راگەیاند، زۆر پێویستیان بە قەستەرە هەیە لە سنووری ئاکرێ، بەڵام تائێستا هیچ سەنتەرێکی قەستەرە نییە و ئەمەش وایکردووە کە 90٪ـی حاڵەتە کتوپڕەکانی دڵ و لوولەکانی خوێن رەوانەی دهۆک و هەولێر بکرێن.

 

د. سەروار موسڵیح، بەڕێوەبەری تەندروستیی ئاکرێ دەڵێت: سێ ساڵە رەزامەندی دراوە لەسەر دروستکردنی سەنتەری قەستەرە لە ئاکرێ، بەڵام تائێستا نەبووەتە تەندەر و کار لەسەر دروستکردنی نەکراوە.

 

ئەوەش روون دەکاتەوە، هەر کەسێک جەڵتەی دڵ لێی بدات یاخود تووشی نەخۆشییە کتوپڕەکانی دڵ و لوولەکانی خوێن بێت، ناتوانن چارەسەر و پشکنینی بە قەستەرە بۆ بکەن و رەوانەی دهۆک یان هەولێری دەکەن کە ئەمەش خەرجیی زیاترە بە کەسوکاری نەخۆش و جێی مەترسیی رووداوەکانی هاتووچۆیە.

 

بەڕێوەبەری تەندروستیی ئاکرێ کێشەیەکی دیکەیان باس دەکات و دەڵێت: پسپۆڕی نەشتەرگەری و نەخۆشییەکانی مێشک و دەمارمان نییە و هەر کەسێک جەڵتەی مێشک یاخود زەبری مێشکی هەبێت، دەبێت راستەوخۆ رەوانەی دهۆک بکرێت.

 

بەپێی ئامارەکانی نەخۆشخانەی گشتیی ئاکرێ کە ناوی (نەخۆشخانەی گوڵان)ـە، تەنیا لە مانگی رابردوودا چوار هەزار و 280 کەس سەردانی بەشی فریاکەوتنیان کردووە و حەوت هەزار و 521 کەسیش سەردانی راوێژکارییەکانیان کردووە. د. سەروار گوتی کە زۆرترین نەخۆشییەکان هەناوین و جۆرە ڤایرۆسێکیش باوە کە تووشی کۆئەندامی هەرس دەبێت.

 

ژمارەی دانیشتووانی قەزای ئاکرێ بە بەردەڕەشیشەوە نزیکەی 400 هەزار کەس دەبێت. دوو نەخۆشخانەی گەورە لە ئاکرێ هەن (نەخۆشخانەی گوڵان) و (نەخۆشخانەی منداڵان و منداڵبوون) کە تەنیا لەوەی دووەمیان ساڵانە نزیکەی هەشت هەزار منداڵ لەدایکدەبن و زۆرجاریش تەختەکانی نێو نەخۆشخانەکە پڕن لە منداڵ و هەزارانیش چارەسەر دەکرێن.