پسپۆڕێکی دەروونی: گەنجان بەهۆی زۆریی گوشاری دەروونییەوە رەشبینن

 

ئەمڕۆ سێشەممە 12-8-2025 د. عەدنان ئەسعەد، پسپۆڕی نەخۆشییە دەروونییەکان لە بووڵتەنی تەندروستیدا رایگەیاند، تۆڕە کۆمەڵایەتییەکان یەکێکن لە هۆکارە باوەکانی زیادبوونی نائومێدی و ناڕێکیی دەروونی کە ئەمانەش رەشبینی بەدوادا دێت.

 

د. عەدنان ئەسعەد روونی دەکاتەوە، چاولێکەری و دوورخستنەوەی گەنج لە ژیانی راستەقینە وایانکردووە هەستی رەشبینی و نائومێدی زۆر بێت.

 

رۆژی جیهانی گەنجانە و هەرگیز جیهان ئەوەندە گەنج نەبووە، پسپۆڕێكی تەندروستیی گشتی لە هەرێمی کوردستان دەڵێت، گەنجانی ئێمە ناگەنە تەمەنی بەساڵاچوون و بە گەنجی دەمرن.

 

بەپێی سەرژمێریی عێراق تەنیا 4.3%ـی دانیشتووانی کوردستان تەمەنیان سەرووی 65 ساڵە. پسپۆڕێكی تەندروستیی گشتییش دەڵێت ئەمە کارەساتە و گەنجانی ئێمە ناگەنە تەمەنی بەساڵاچوون و بە گەنجی دەمرن.

 

بەگوێرەی ئاماری سەرژمێری هەرێمی کوردستان و عێراق  60.44٪ دانیشتوان تەمەنیان لە نێوان 14-64 ساڵانە و د. سەنگەر جاف، پسپۆڕی تەندروستیی گشتی دەڵێت ئامارەکان دەریدەخەن رێژەی گەنج لە کوردستان زۆرە، بەڵام مەترسییەکە ئەوەیە کە رێژەی بەساڵاچوو کەمترە و ئەمەش نیشاندەری ئەوەیە کە خەڵکی کوردستان لە تەمەنێكی گەنج دەمرن.