پڕۆفیسۆرێکی ئیتاڵی لە رووداوەوە: دەمانەوێت ببینە رێنیشاندەر بۆ پزیشکانی کوردستان

 

ئەمڕۆ شەممە 13-9-2025 پڕۆفیسۆر د. ستیفانۆ دی گیرۆلامۆ، پسپۆڕی وردی نەشتەرگەرییەکانی قوڕگ، لووت و گوێ لە ئیتاڵیا لە ستۆدیۆی رووداو لە سلێمانییەوە رایگەیاند، ئامانجمان ئەوەیە ببینە رێنیشاندەرێک بۆ هەموو پزیشکانی هەرێمی کوردستان.

 

لەبارەی د. گۆرانەوە گوتی، نزیکەی 10 ساڵە یەکدی دەناسین و زۆر سەرسامم بە کارەکانی بەتایبەت لە نەشتەرگەریدا، ئەمەش وای لە من کرد بەردەوامبن لە پەیوەندیکردن لەگەڵیدا و کتێبێکی لەو شێوەیە بنووسینەوە.

 

لەبارەی نەشتەرگەریی لووتەوە دەڵێت: تەکنیکی وردی پێویستە و پێویستە بەگوێرەی دەموچاوی چارەخوازەکە بێت، واتا نابێت زێدەڕۆیی لە بچووککردنەوە یاخود دەستکاریکردنی بکرێت.

 

 

پڕۆفیسۆر د. ستیفانۆ دی گیرۆلامۆ رایدەگەیێنێت، پێشووتر لە ئیتاڵیا تەمەنی تێکڕای کەسێک 50 ساڵ بوو، بەڵام ئێستا بووە بە 80 بۆ 84 ساڵ.

 

ئەو پێی وایە هۆکارەکانی تەمەندرێژبوونی ئیتاڵییەکان پەیوەندییان بە (بۆماوە، شێوازی ژیان و کواڵیتیی هەواوە) هەیە، باسی خۆراکی تەندروستیش دەکات کە هۆکارێکی هەرە گرنگە.

 

 

ئەو پڕۆفیسۆرە بە نەخێر وەڵامی دایەوە و گوتی، ''دەتوانین لە هەندێك نەشتەرگەری بۆ یارمەتیدانی پزیشک بەکاربێن، چونکە یارمەتیدەرێکی باشە''.

 

 

پرخەپرخ کێشەیەکی باوی نێو خەڵکە و بەتایبەتیش هاوژینان رقیان لەمە دەبێتەوە، ئەو پڕۆفیسۆرە دەڵێت: ئەگەر هۆکاری پرخەکە لە لووت یاخود سییەکاندا بوو و هەناستەنگی لەگەڵدا بوو، ئەوا پێویستە چارەسەر بکرێت.

 

ئەوەش پێشنیاز دەکات، کە هاوژینان دەتوانن هەر کامیان پرخەیان هەبێت، ژوورەکەیان بگۆڕن یاخود تەنێکی بچووک دابنێن کە پرخەپرخ کەم دەکاتەوە. تەنانەت پڕۆفیسۆر د. ستیفانۆ وەرزش و کەمخۆریی پێش نووستن بە کاریگەر دادەنێت بۆ کەمکردنەوەی پرخە.