زانایانی چین بە نانۆڕۆبۆت رێگەیەک بۆ چارەسەرکردنی شێرپەنجە دادەهێنن

 

توێژەرێک دەڵێ، نانۆڕۆبۆت وا لە خانە شێرپەنجەییەکان دەکات ئاسانتر لەلایەن بەرگرییە خانەکانەوە بناسرێنەوە. لە چین ساڵانە زیاتر لە 3 ملیۆن تووشبووی شێرپەنجە تۆمار دەکرێن.

 

لە پەیمانگەی زانستی گەردیلەیی لە شانگەهای، توێژەران رێگەیەکی نوێ بۆ بەهێزکردنی بەرگریی جەستە دژی شێرپەنجە دەدۆزنەوە و پشت بە تەکنەلۆژیای نانۆڕۆبۆت دەبەستێت.

 

هان شۆو، توێژەر لە پەیمانگەی زانستی گەردیلەیی لە شەنگهای دەڵێت: ''ئەمە بەشێوەیەکی تایبەتمەندانە دەبەسترێ بە خانە شێرپەنجەییە دەستنیشانکراوەکانەوە، ئەمەش وا لە بەرگرییە خانەکان دەکات بیانناسنەوە و بە باشی لەنێویان ببەن''.

 

ئەو رێگەیەی زانایان دۆزیویانەتەوە، بریتییە لە بەکارهێنانی نانۆڕۆبۆت بۆ دەستنیشانکردنی خانەکانی شێرپەنجەیە بە مادەیەکی کیمیایی تایبەت، تاوەکو خانەکانی بەرگریی لەشی تووشبووەکە، هێرشی زیاتر بکەن و خانە شێرپەنجەییەکان لەنێو ببەن.

 

نانۆڕۆبۆت ئامێرێکی بچووکە و بە ژیریی دەستکرد کۆنترۆڵ دەکرێ، زۆرجار لە ڤایرۆسێکیش بچووکترە تاوەکو بچێتە نێو جەستەوە و کار لەسەر خانەی ئامانجدار بکات بۆ گەیاندنی دەرمان و مادەی کیمیایی؛ لە رێگەی خوێن یان قوتدانەوە دەخرێتە نێو جەستە.

 

توێژەران بە ئومێدن ئەم داهێنانە لە چارەسەرەکانی دیکە، خێراتر و کاریگەرتر بێ. لی شۆوجون، توێژەری باڵا لە پەیمانگەکە دەڵێت: ''بەم رێگەیە پێویستمان بە گۆڕانی بۆماوەیی نابێ، کاتی گەشەسەندن کەم دەکاتەوە و گونجاویی زیندەییش زیاد دەکات، بە چالاککردنی لەگەڵ رووناکیی سوور یان سۆنەر کاریگەرییەکەی زیاد دەبێ''.

 

لە چین ساڵانە زیاتر لە 3 ملیۆن تووشبووی شێرپەنجە تۆماردەکرێن و نزیکەی دوو ملیۆنیش گیان لەدەستدەدەن. بۆیە توێژەرانی کەرتی پزیشكی، هەمیشە یەکێک لە داهێنانەکانیان دۆزینەوەی رێگەچارە بووە بۆ رووبەڕووبوونەوەی شێرپەنجە و رێگری لە مردنی ملیۆنان کەس بە نەخۆشییەکە.