لە سلێمانی تووشبوویەکی نوێی تای خوێنبەربوون دەستنیشانکرا

 

بە گوێرەی راگەیێندراوێکی وەزارەتی تەندروستی، تووشبووەکە پیاوێکی تەمەن 41 ساڵە و دانیشتووی گەڕەکی چوارچرای شاری سلێمانییە. هۆکارەکەشی بۆ "بەرکەوتنی لەگەڵ ئاژەڵی تووشبوو لەکاتی سەربڕینی چەندین ئاژەڵ" گەڕێندراوەتەوە.

 

وەزارەتەکە ئاماژەی بەوەشکردووە، دوای دەرکەوتنی نیشانەکانی نەخۆشییەکە، پشکنینی پێویستی بۆ کراوە و ئێستا لە نەخۆشخانە لەژێر چاودێریی پزیشکیدایە و چارەسەر وەردەگرێت.

 

لەبارەی ئاماری نەخۆشییەکە لە هەرێمی کوردستان، لە راگەیێندراوەکەدا هاتووە کە لە ماوەی دوو مانگی رابردوودا، لە کۆی چەندین حاڵەتی گومانلێکراو، تەنیا 6 تووشبوون بە تای خوێنبەربوون پشتڕاستکراونەتەوە. لەو 6 تووشبووە، تووشبوویەک بەهۆی سەختیی نەخۆشییەکەیەوە گیانی لەدەستداوە و حاڵەتەکانی دیکە بە تەواوی چاکبوونەتەوە و نەخۆشخانەیان جێهێشتووە.

 

وەزارەتی تەندروستی داوا لە هاووڵاتیان دەکات پابەندی رێنوێنییەکان بن و لەکاتی هەبوونی گومان لە تووشبوونی ئاژەڵەکانیان، تیمەکانی ڤێتێرنەری ئاگاداربکەنەوە. 

 

هاوکات داوا لەو کەسانە دەکات کە بەرکەوتنیان لەگەڵ ئاژەڵ هەیە، لەکاتی دەرکەوتنی هەر نیشانەیەکی نائاسایی، "بەخێرایی و بێ دواکەوتن" سەردانی نەخۆشخانە بکەن.