پسپۆڕێک: بنکەی ئەتۆمی بتەقێتەوە هەمووان مەترسیی تووشبوون بە شێرپەنجەیان دەبێت

 

د. تۆڵە فەرەج، پسپۆڕی بەرگریزانی و مامۆستای زانکۆ لە زانکۆی تیشک ئەم مەترسییانە روون دەکاتەوە؛ 

 

- تەقینەوەی ئەتۆمی بڕێکی زۆر لە وزە لە شێوەی تەقینەوە، گەرمی و تیشکدا بڵاو دەکاتەوە.

 

- تەقینەوەکە دەبێتە هۆی گیانلەدەستدانی کەسانی نزیک لە شوێنی تەقینەوەکە، هەروەها دەبێتە هۆی برینداربوونی سییەکان، زیانگەیاندن بە گوێ و خوێنبەربوونی ناوەکی.

 

- تیشک و گەرمیی تەقینەوەی ئەتۆمی ئەوەندە چڕ و پڕە کە هەموو گیاندارێکی نزیک بە هەڵم دەکات.

 

- تەنانەت ئەو کەسانەی لە پەناگە و ژێرزەمینییەکاندان بەهۆی کەمیی ئۆکسجین و ژەهراویبوون بە یەکەئۆکسیدی کاربۆن، ئەگەری مردنیان هەیە.

 

- چەکی ئەتۆمی تیشکی ئایۆنی بەرهەم دەهێنێت، ئەو کەسانەی بەرکەوتەی ئەم تیشکانەن گیانلەدەستدەدەن یان نەخۆش دەکەون، تەنانەت ژینگەش پیس دەکات و لێکەوتەی تەندروستیی درێژخایەنیشی لەسەر مرۆڤ دەبێت بەتایبەت شێرپەنجە.

 

- کاریگەرییە تەندروستییە دەستبەجێیەکان وەکو 'رشانەوە، سکچوون، هەڵوەرینی قژ، خوێنبەربوون، سووتانی تەواوی جەستە و مردن لەماوەی چەند رۆژێک یان هەفتەیەکدا بەپێی رێژەی تیشکی بەرکەوتوو'.

 

- ئەنجامە تەندروستییە درێژخایەنەکان بریتین لە 'زیادبوونی مەترسیی تووشبوون بە شێرپەنجە بەتایبەتی شێرپەنجەی خوێن، غودە، مەمک و سییەکان، گۆڕانکاریی بۆماوەیی، ئەگەری ناتەواوی و کەموکوڕیی لەدایکبوون لە کەسانی رزگاربوو'.

 

- سەڕهەڵدانی نەخۆشییە درێژخایەنەکان وەکو نەخۆشییەکانی دڵ و لوولەکانی خوێن، تێکچوونی کۆئەندامی هەناسەدان و تێکچوونی بەرگریی جەستە.