چیرۆکی ئەو پزیشکەی لەکاتی نەشتەرگەریدا بوورایەوە و ژیناویان بۆ دانا

 

ئەم رووداوە لە ساڵی 2021ـدا لە نەخۆشخانەیەکی تورکیادا روویدا و پڕۆفیسۆر د. ئۆغوز باسوت کە لە نێوەڕاستی نەشتەرگەرییەکی ئاڵۆزی لابردنی گرێی لیکەڕژێنی نەخۆشێکیدا بووە، دۆخی تەندروستیی تێکچوو و بوورایەوە، بەڵام تیمەکەی کانیولایەکیان بۆ دانا و لەسەر خواستی خۆی، نەشتەرگەرییەکەی رانەگرت.

 

ئەو نەخۆشخانەیە بڵاوی کردووەتەوە، ئەو پزیشکەی نەشتەرگەرییەکەی کردووە، رۆژێک پێش نەشتەرگەرییەکە خۆراکی پیسی خواردووە و بەهۆیەوە ژەهراوی بووە، لەنێو نەشتەرگەرییەکە پەستانی خوێنی دابەزیوە و خەریکبووە لەهۆش خۆی بچێت، بەڵام پسپۆڕەکە رەتیکردووەتەوە کە نەشتەرگەرییەکە بووەستێنێت.

 

تیمەکەی کانیولایەکیان لە پێی پزیشکەکە دانا و ژیناویان پێیدا، تاوەکو بارودۆخی جێگیر بێتەوە و پەستانی خوێنی هاوسەنگ ببێتەوە، کانیولاکەیان لە دەستی دانەنا، چونکە هەردوو دەستی ئەو پزیشکە گیرابوون و نەشتەرگەرییەکەی پێدەکردن. 

 

د. ئۆغول باسووت ئەو پزیشکە بوو کە سەرپەرشتیی نەشتەرگەرییەکەی دەکرد و ئاوای لێبەسەرهاتووە دەڵێت: لە دۆخێکدا نەبووم کە واز لە نەشتەرگەرییەکە بهێنم و ''ئەگەر هەر پزیشکێک لە شوێنی من بووایە، هەمان کاری دەکرد و نەشتەرگەرییەکەی رانەدەگرت''.

 

 

بەگوێرەی ناوەندی کلیڤلاندی پزیشکی، بێهۆشبوون لە ژووری نەشتەرگەریدا دەشێت بەهۆی 'گوشار، گەرما، کەمیی خۆراک، نەخۆشی'ـەوە بێت. بۆ رێگریکردنیش پشوودانی کورتی دەروونی و جەستەیی پێویستە.

 

 

چیرۆکی دیکەی بوورانەوە و تێکچوونی دۆخی تەندروستیی پزیشکانی نەشتەرگەری لەکاتی نەشتەرگەریدا زۆرن، لە چین پزیشکێکی 58 ساڵ دوای تەواوکردنی حەوت نەشتەرگەری لە دوو رۆژدا بەبێ وەستان، لەنێو ژووەکە کەوت و بە تەواوی شەکەت بوو {ڤیدیۆکەی لە سەرەوە دانراوە}.

 

پزیشکێکی دیکەش بە ناوی لو هێنگ کە بۆماوەی 28 کاژێر لەسەر یەک خەریکی نەشتەرگەرییەکانی بوو، کەوتە سەر زەوی و شەکەت بوو. تەنانەت نەک پزیشکانی نەشتەرگەری بەڵکو کارمەندانی تەندروستیش لەم رووداوانە بێبەش نین و زۆرینەشیان بەهۆی گوشاری دەروونی و کەمخەوییەوە دووچاری ناڕێکیی زۆر دەبنەوە.