لە سلێمانی نەوجەوانێک پوولێکی دۆمینە لە دەمیدا دەشارێتەوە و قوتی دەدات

 

ئەمڕۆ پێنجشەممە 18-12-2025 د. هیوا ئەبوبەکر، پسپۆڕی نەخۆشییەکانی هەرس و جگەر سەرپەرشتیی پڕۆسەی دەرهێنانی پوولەکەی کردووە و بە رووداوی راگەیاند، ئەوە نەوجەوانێکی 14 ساڵی نابیست بوو، لەکاتی دۆمینەکردندا پوولەکەی لە دەمدا شاردووەتەوە و بە نائاگایی، قوتیداوە.

 

د. هیوا ئەبوبەکر دەڵێت: بەهۆی ئەوەی خەڵکی چەمچەماڵ بوون و لە زیانلێکەوتووانەی لافاوەکە بوون، چەند رۆژێک پوولەکە لە گەدەیدا ماوەتەوە و دوێنێ چوارشەممە بە هاوکاریی ستافێکی شارەزای نەخۆشخانەکە، لەڕێگەی هەناوبینەوە لەژێر سڕکردنی گشتیدا بە نزیکەی 90 خولەک دەرهێنرا.

 

ئەو پسپۆڕە گوتی، دەرهێنانی تەنی نامۆ بە قەبارەی گەورە زەحمەتە بەتایبەت پوولی دۆمینە، لەکاتێکدا ئەوان پێیان وایە، دەرهێنانی مووکێش و تەنی بچووک زۆر ئاسانترە لە دەرهێنانی پوولی دۆمینە.

 

 

د. هیوا ئەبوبەکر دەڵێت: پوولەکە دەچووە نێو ریخۆڵە و دووانزە گرێیە و تووشی گیرانی ریخۆڵەکانی دەبوو، ئەوەش دەبووە لێکەوتەیەکی مەترسیدار و دەبوایە بە نەشتەرگەری دەربهێنرایە.

 

 

- دوورخستنەوەی ئەو کەلوپەلانەی بە ئاسانی قوتدەدرێن لە منداڵ.

- ئەگەر نەخۆشەکە تەنەکەی لە سوورێنچکی گیربووبوو، نابێت دەست ببرێتە قوڕگی منداڵەکە و هەوڵی دەرهێنانی بدرێت، بەڵکو بگەیێندرێتە نەخۆشخانە.

- نابێت نەخۆشەکە هیچ خۆراک و خواردنەوەیەک بخواتەوە تاوەکو بە ئاسانی تەنەکە دەربهێندرێت.

- ئەگەر تەنەکە چووبووە نێو بۆری هەناسەی، ئەوا بە تەکنیکەکانی فریاگوزاریی سەرەتایی بۆ بکرێت یان راستەوخۆ ببرێتە نزیکترین نەخۆشخانە.