نەخۆشخانەیەکی سەرەکیی ئیسرائیل بۆردوومان کرا

 

بەپێی سەرچاوەکانی ئیسرائیل، ئەم بەیانییە مووشەکێکی بالیستی درا لە باڵەخانەیەک لە ناوەندی شاری بێرشێڤا و زیانێکی زۆری لێکەوتەوە، ئەو باڵەخانەیەش هی نەخۆشخانەی سۆرۆکا بوو.

 

گوتەبێژی نەخۆشخانەکە دەڵێت: باڵەخانەیەک بە تەواوی لە نەخۆشخانەی سۆرۆکا رووخاوە کە سەربازە بریندارەکانی جەنگی غەززەی تێدا چارەسەر دەکرێت و ئێستا سەرقاڵی خەمڵاندنی زیانەکانن.

 

ناوەندی پزیشکیی سۆرۆکا ''نەخۆشخانەی سۆرۆکا'' دەکەوێتە باشووری ئیسرائیل و لە شاری بێرشێڤا، زیاتر لە هەزار تەختی نەخۆشخانەی تێدایە و بە یەکێک لە گەورەترین نەخۆشخانەکانی ئیسرائیل دادەنرێت.

 

دوای ئەم هێرشە رێکخراوی تەندروستیی جیهانی بانگەوازی بەپەلەی ئاراستەی وڵاتان کرد کە رێز لە یاسا مرۆییەکان بگرن و دامەزراوە پزیشکی و مەدەنییەکان نەکەنە ئامانجی ململانێی سیاسی و بۆردوومانەکان.

لێرەوە دیمەنی نێو نەخۆشخانەکە ببینە.