نهێنییەک لەبارەی گیانلەدەستدانی ئەو ژنەی کەلار کە دوای وەرگرتنی دەرزییەک، گیانی لەدەستدا
رووداو - تەندروستی
لە کەلار خانمێکی بەساڵاچوو دوای ئەوەی دۆخی تێکدەچێت و دەچێتە نەخۆشخانەیەکی تایبەت، سێ کارمەندی تەندروستیی نەخۆشخانەکە پشکنینی بۆ دەکەن و دەرمانی پێدەدەن، بەڵام دوای وەرگرتنی دەرمانەکان، دۆخی ئەو خانمە تێکدەچێت و دەیبەن بۆ نەخۆشخانەیەکی دیکە، لەوێشەوە دەیبەنە نەخۆشخانەیەکی دیکەش و ئیدی لەوێ بە تەواوی گیان لەدەستدەدات.
ئەو ژنە ناوی بەدریە عەبدوڵڵایە و دوو کوڕی قسەیان بۆ رووداو کردووە (لێرەوە هەموو قسەکانیان بزانە)، ئەوان دەڵێن، بەهۆی پێدانی دەرمانی هەڵەوە گیانی لەدەست داوە.
رۆژی یەکشەممە 19-4-2026 ئازاد حەمەفەرەج، گوتەبێژی تەندروستیی گەرمیان لە بووڵتەنی کاژێر 17:00 بە رووداوی راگەیاند، لێکۆڵینەوە لەو دۆسییەیە بەردەوامە و لێکۆڵینەوە لە هەر سێ نەخۆشخانەکە دەکرێت.
ئازاد حەمەفەرەج ئەوەشی گوت کە وەزارەتی تەندروستی لیژنەی لێکۆڵینەوە لە گیانلەدەستدانی ئەو خانمە پێکدەهێنێت و ئەوان وەکو تەندروستیی گەرمیانیش دوای گیانلەدەستدانی خانمەکە ئاگادارکراونەتەوە و پێشوەختە هیچ سکاڵایەکیان بۆ نەکراوە.
لەنێو هەواڵەکەیدا، شەهیان تەحسین قسەی یەکێک لە کارمەندەکانی ئەو نەخۆشخانە تایبەتە دەگێڕێتەوە کە پێی گوتووە ''دەرزییەکە هەمان ئەو دەرزییە نەبووە کە بۆ نەخۆشەکە نووسراوە و گۆڕدراوە، چونکە دەرزییەکە زۆر گرانە، بۆیە ئەو دەرمانەمان بەکارنەهێنا کە ستیکەری لەسەرە، بەڵکو ئەوەمان بەکارهێنا کە بە قاچاخ دەهێندرێت و هەرزانترە''.