ئەو پزیشکەی نەشتەرگەریی بۆ شیلان کرد، ئەمڕۆ بانگهێشتی دادگە کرا

 

ئەمڕۆ سێشەمە 20-5-2025 سێ کەسی دیکە بە تۆمەتی مردنی شیلان ئیسماعیل بانگهێشتی دادگە کران و بەپێی زانیارییەکانی پەیامنێری رووداو لە زاخۆ، ئەم سێ کەسەی ئەمڕۆ یەکێکیان ئەو پزیشکەیە بووە کە نەشتەرگەریی بۆ شیلان کردووە.

 

غەریب مەجید، پەیامنێری رووداو لە زاخۆ بە دێسکی تەندروستیی رووداوی گوت، ''ئەو سێ کەسە بە کەفالەت ئازاد کراون''.

 

دوێنێ لەسەر ئەو بابەتە، پێنج کەس بانگهێشتی دادگە کران و دووانیان دەستگیر کرا.

 

شیلان ئیسماعیل تەمەنی 38 ساڵ و دایکی شەش منداڵ بوو، رۆژی 01-05-2025  بەمەبەستی لەدایکبوونی حەوتەمین منداڵی، رەوانەی نەخۆشخانەی ژنان و منداڵانی زاخۆ کرا، رۆژی شەممە، 17-05-2025، دوای 17 رۆژ بێهۆش بوون و مانەوە لە نەخۆشخانە، شیلان کۆچی دوایی کرد و 7 منداڵی بێ دایک جێهێشت.