بەڕێوەبەری نەخۆشخانە نوێیەکەی ئامێدی: هەموو کارمەندەکانمان گرێبەستن

 

نەخۆشخانەکە لە 100 قەرەوێڵە و چوار نهۆم و 6 هۆڵی نەشتەرگەری پێکدێت و ئەمڕۆ چوارشەممە 22-10-2025 د. عەگید ئامێدی، بەڕێوەبەری نەخۆشخانەی  شۆرەش - هێتیت لە شیلادزێ لە بووڵتەنی کاژێر 13:00 بەشداربوو و رایگەیاند، پسپۆڕی وردی بۆ دابینکراوە و ئامێر و پێداویستییەکانیش بەردەستن بۆ ئەوەی بە باشترین شێوە چاودێریی نەخۆش بکەن.

 

د. عەگید ئامێدی دەڵێت: نەخۆشخانەکە لە سنووری قەزای ئامێدییە و لە ناوچەکانی کۆتایی سۆرانەوە تاوەکو بامەڕنێ دەتوانن سوود لە نەخۆشخانەکە ببینن.

 

لەبارەی کارمەندی نەخۆشخانەکەوە ئاشكرای کرد، هەموویان گرێبەستن و نوێش دەبنەوە، کۆمەڵێک کارمەندی دیکەش لە نەخۆشخانەکانی دهۆکەوە گوازراونەتەوە بۆ نەخۆشخانەی شۆرەش - هێتیت.

 

لە بارەی بوودجەکەی د. ئەفراسیاب مووسا، بەڕێوەبەری گشتیی تەندروستیی دهۆک دەڵێت، نەخۆشخانەی 100 قەرەوێڵەیی شۆرەش - هێتیت بە گوژمەی 43 ملیۆن دۆلار دروستکراوە و هەموو ئامێر و پێداویستییەکی پزیشکیی پێشکەوتووی بۆ دابین کراوە.

 

وارشین سەلمان، قائیمقامی ئامێدیش بە تۆڕی میدیای رووداوی راگەیاند، هەموو ئامادەکاریەک بۆ کردنەوەی نەخۆشخانەی 100 قەرەوێڵەییەکەی شۆرەش – هێتیت لە کۆمەڵگای هێتیت لە سنووری قەزای ئامێدی کراوە، هەموو ئامێر و پێدایستییەکان و پزیشک و کارمەندانی تەندروستی بۆ دابینکراوە.