لە کۆیە گرێیەکی گەورە لە منداڵدانی خانمێکی گەنجدا دەرهێنرا

 

ئەمڕۆ پێنجشەممە 23-10-2025 د. شەهلا رەئوف، سەرپەرشتیارێکی نەشتەرگەرییەکە و پسپۆڕی نەخۆشییەکانی خانمان و منداڵبوون لە نەخۆشخانەی فێرکاریی شەهید د. خالید بە رووداوی راگەیاند، خانمەکە 41 ساڵ بوو و گرێی ریشاڵیی منداڵدانی هەبووە، کە گرێیەکی باوە و زۆرجار هیچ نیشانەیەکی نییە، بەڵام هەندێکجاریش ئازاری خوارەوەی سک و قورسایی سک نیشانەن.

 

لەبارەی هۆکارەکانی دروستبوونی ئەو گرێیەوە د. شەهلا رەئوف گوتی، ''نەزانراوە، بەڵام دەشێت قەڵەوی، خۆراکی ناتەندروست و بۆماوەیی رێخۆشکەر بن بۆ دروستبوونی''.

 

ئەو پسپۆڕە ئاشكرای کرد، لەبەر ئەوەی ئەو خانمە سێ جار نەشتەرگەریی منداڵبوونی بۆ کرابوو، نەشتەرگەریی دەرهێنانی گرێیەکە زۆر ئاڵۆز بووە.

 

لە کۆتاییشدا پێشنیاز دەکات، خانمان شەش مانگ جارێک سۆنەر بکەن.

 

 

- دابەزاندنی کێش و کێشڕێکی

- دوورکەوتنەوە لە خۆراکە خێراکان

- کەمکردنەوە و دوورکەوتنەوە لە خواردنەوە گازییەکان

- بایەخدان بە خواردنی سەوزە و میوەکان

- وەرزش و جووڵەی رۆژانە

- رێکخستنی کاتی خەو