گەشتوگوزاری هەرێمی کوردستان: باجی رێستورانتی خۆراکە خێرا و خۆماڵییەکان وەکو یەکە

 

ئیبراهیم عەبدولمەجید، گوتەبێژی دەستەی گەشتوگوزاری هەرێمی کوردستان دەڵێت: رێستورانتە خێراکان لەڕووی پشکنین و پۆلێنکردنەوە و لەڕووی وەرگرتنی باج و رسومات هیچ جیاوازییەکیان نییە لەگەڵ رێستورانتە میلییەکان لە هەرێمی کوردستان. 

 

لە بەرامبەردا لە وڵاتە پیشکەوتووەکانی جیهاندا وەکو بەشێک لە رێکارەکانی رێکخراوی تەندروستیی جیهانی بۆ هاندانی بەکارهێنانی خۆراکە خۆماڵییەکان و دوورخستنەوەی خەڵک لە خۆراکە خێراکان، باجی سەر رێستورانتەکانی خۆراکە خۆماڵی و تەندروستەکان بە رێژەی ٪15 بۆ ٪35 لە باجی سەر رێستورانتەکانی فاست فوود کەمترە.

 

ئەمەش رێگەیەکە بۆ سنووردارکردنی خۆراکە خێراکان کە هۆکارن بۆ تووشبوون بە نەخۆشییەکانی دڵ و لوولەکانی خوێن، قەڵەوی، شێرپەنجە و نەخۆشییە درێژخایەنەکانی دیکە.

 

رێکخراوی تەندروستیی جیهانی خۆراکە خێراکان بە هۆکاری تووشبوون بە چەندین نەخۆشی دادەنێت و داوا لە وەزارەتی تەندروستیی وڵاتان دەکات، هەنگاوی کرداری و کاریگەر بۆ دوورخستنەوەی خەڵک لێیان بگرنە بەر.