توێژینەوەیەک: زۆر خەوتن لە کەمخەوتن مەترسیدارترە

 

 

توێژینەوەکە لەلایەن زانکۆی سمیلویسی هەنگارییەوە کراوە، بە پشتبەستن بە داتا و ئەنجامی 79 لێکۆڵینەوەی دیکەی پزیشکی، کە 2.1 ملیۆن کەس بۆ ماوەیەکی درێژ تێیاندا بەشدار بوون.

 

ئەم جۆرە توێژینەوانە تۆکمەتر و باوەڕپێکراوترن، لە زانستی پزیشکیدا زیاتر پشتیان پێدەبەسترێت، چونکە شرۆڤەی وردی ئەنجامی چەندین توێژینەوەی زانستی دیکە دەکەن.

 

ئەنجامی ئەم توێژینەوەیە ئاشکرای دەکات، ئەگەر مرۆڤ هەموو شەوێک کەمتر لە 7 کاژێر بخەوێت، مەترسیی مردنی 14% زیاترە بەراورد بەوانەی 7 تاوەکو 8 کاژێر دەخەون. 

 

بەڵام ئەوانەی زیاتر لە 9 کاژێر دەخەون، مەترسیی مردنیان 34% زیاترە.

 

توێژینەوەکە ئاماژە بەوە دەکات، پەیوەندییەکی بەهێز لە نێوان زۆر خەوتن و تێکچوونی تەندروستی هەیە.

 

بە گوێرەی توێژینەوەکە، ئەگەرچی زۆر خەوتن هۆکاری راستەوخۆی نەخۆشی نییە، بەڵام دەکرێت رێگەخۆشکەر بێت بۆ نەخۆشییە درێژخایەنەکان، تێکچوونی خەو، خەمۆکی، کێشەی هەرسکردنی خۆراک و شەکەتی.

 

توێژینەوەکە جەخت دەکاتەوە کە تێکڕای ماوەی نموونەیی بۆ خەوتنی کەسێکی ئاسایی، 7 تا 8 کاژێرە لە هەر شەوێکدا.