راوێژکارێکی سوودانی: کارگەیەکی بەرهەمهێنانی دەرمانی شێرپەنجە لە سلێمانی دروستدەکرێت

 

 

 

ئەمڕۆ سێشەممە، 26-08-2025، د. حەموودی لامی، راوێژکاری محەممەد شیاع سوودانی، سەرۆکوەزیرانی عێراق بۆ کاروباری تەندروستی، بە تۆڕی میدیایی رووداوی راگەیاند: "لە کۆتایی 2022، بەرهەمی نێوخۆیی دەرمان تەنیا 9٪ی پێداویستییەکانی پڕدەکردەوە، بەڵام ئێستا بۆ زیاتر لە 38٪ بەرزبووەتەوە و پێشبینی دەکەین لە شەش مانگی داهاتوودا بگاتە 50٪."

 

بە گوتەی راوێژکارەکەی سوودانی، ژمارەی کارگە کاراکانی بەرهەمهێنانی دەرمان لە 22 کارگەوە بۆ 34 کارگە زیادیکردووە و بە توانای تەواو کاردەکەن. گوتیشی: "17 کارگەی دیکە لە قۆناخی دروستکردندان و رێژەی تەواوبوونیان لەنێوان 70٪ بۆ 90٪ـدایە، هاوکات 178 داواکاریی نوێش بۆ دروستکردنی کارگەی دەرمان و پێداویستیی پزیشکی لەلایەن کەرتی تایبەتەوە پێشکێشکراون."

 

د. حەموودی لامی ئاماژەی بەوەدا، عێراق لە بەرهەمهێنانی ژیناو (مغذی) و سرنجی دەرزیدا گەیشتووەتە ئاستی خۆبژێوی و زیاتر لە 2000 جۆر دەرمان لە کارگە نێوخۆییەکاندا بەرهەمدەهێنرێن.

 

 

راوێژکارەکەی سوودانی ئاشکرای کرد، چوار کارگەی تایبەت بە بەرهەمهێنانی دەرمانی چارەسەری شێرپەنجە لە قۆناخی دروستکردندان کە بریتین لە:

 

کارگەی یەکەمی بەغدا: گەورەترینە لە ناوچەکەدا و تێچووەکەی زیاتر لە 60 ملیۆن دۆلارە. قۆناخی یەکەمی لە دوو مانگی داهاتوودا دەکرێتەوە.

 

کارگەی بەسرە: کارەکانی لە تەواوبووندایە و پێش کۆتایی ئەمساڵ دەکەوێتە کار.

 

کارگەی دووەمی بەغدا: پێشبینی دەکرێت ساڵی داهاتوو تەواو بێت.

 

کارگەی هەرێمی کوردستان لە سلێمانی: سەر بە کۆمپانیای پایۆنیرە و پێش کۆتایی ئەمساڵ دەست بە بەرهەمهێنان دەکات.

 

سەبارەت بە کوالێتیی دەرمانەکانیش، د. حەموودی لامی گوتی: "بەرهەمهێنانەکە بەگوێرەی نوێترین ستانداردە جیهانییەکان و دەستووری دەرمانی ئەمریکی و بەریتانی دەبێت و بۆ چارەسەری شێرپەنجەی مەمک، پرۆستات و هەندێک جۆری شێرپەنجەی خوێن بەکاردێن."

 

 

راوێژکارەکەی سەرۆکوەزیرانی عێراق لەبارەی پشکی هەرێمی کوردستان لە دەرمان و پێداویستیی پزیشکی رایگەیاند: "دەرمان و پێداویستیی پزیشکی بە یەکسانی بەسەر هەموو پارێزگاکاندا دابەش دەکرێت، بە هەرێمی کوردستانیشەوە."

 

ئاماژەی بەوەشکرد، ئەنجوومەنێکی هاوئاهەنگیی پیشەسازی بە سەرۆکایەتیی سەرۆکوەزیران پێکهێنراوە کە نوێنەری هەرێمی کوردستانیشی تێدایە و "سەرجەم بڕیارەکانی پەیوەست بە کەرتی پزیشکی بە کۆی دەنگ دەدرێن."

 

کۆمپانیای دەرمانی سامەڕا کە لە ساڵی 1965 دامەزراوە، تاکە کۆمپانیای فەرمیی سەر بە حکومەتی عێراقە بۆ بەرهەمهێنانی دەرمان و چەندین لقی لە پارێزگاکانی عێراقدا هەیە.