کۆمەڵەی خوێنبەخشانی کوردستان: ئامادەین خوێن بە هاونیشتمانییانمان لە رۆژئاوای کوردستان ببەخشین

 

ئەمڕۆ سێشەممە 27-1-2026 عەبدولقەهار عەلی، سەرۆکی کۆمەڵەی خوێنبەخشانی کوردستان بە رووداوی راگەیاند، لە پارێزگاکانی هەرێمی کوردستان زیاتر لە 11 هەزار ئەندامیان هەیە و جیاواز لە بەخشینەکان دیکە، دەتوانن بە خوێن بەشداربن لە هاوکارییەکان بۆ رۆژئاوای کوردستان.

 

هەر ئەمڕۆ د. عەباس ئازاد، بەرپرسی یەکەی تەندروستیی دەزگای خێرخوازیی بارزانی کە ئێستا لە قامیشلۆی رۆژئاوای کوردستانە بە رووداوی گوت، تائێستا پێیان نەگەیشتووە کە نەخۆشەکان پێویستیان بە خوێن هەبێت، بەڵام ئەوەشی گوت کە بیرۆکەیەکی نایابە و دەشێت لە داهاتوودا بەخشینی خوێن پێویست بێت.

 

د. عەباس ئازاد دەڵێت: ئێستا پێویستییەکی زۆر بە دەرمانەکانی دژەبەکتریا و دەرمانی نەخۆشییە درێژخایەنەکان هەیە، پاشانیش پێداویستییەکانی فریاگوزاریی سەرەتایی.

 

مەریەم ئەحمەد، هاوسەرۆکی دەستەی تەندروستیی جەزیرە لە نیوڕۆژی رووداودا ئاشکرای کرد، پەتا و کۆکەی تووند لەنێو منداڵانی رۆژئاوای کوردستان بڵاو بوونەتەوە. ئەوەشی باس کرد کە بەشێک لە ئەمبوڵانسەکانی کەرتی تەندروستیی رۆژئاوای کوردستان کەوتوونەتە دەست گرووپە چەکدارەکان.