پسپۆڕێک: پشتگوێخستنی نیشانەکان هۆکارێکی زۆربوونی جەڵتەی دڵە لەنێو گەنجان

 

ئەمڕۆ دووشەممە 29-9-2025 د. سەرکەوت داود، پسپۆڕی نەخۆشییەکانی دڵ و قەستەرە، لە بوڵتەنی تەندروستی رایگەیاند، بەگوێرەی ئامارەکانی رێکخراوی تەندروستیی جیهانی، ساڵانە زیاتر لە 18 ملیۆن کەس بە جەڵتەی دڵ گیان لەدەستدەدەن و وڵاتە کەم داهاتەکان زیاتر رووبەڕووی ئەو مەترسییە دەبنەوە.

 

د. سەرکەوت داود، گوتیشی: "بەڵام ئەوەی جێگەی سەرنجە، رێژەی جەڵتەی دڵ لەنێو گەنجاندا لە هەموو وڵاتێکی جیهان روو لە زیادبوونە."

 

سەبارەت بە هۆکارەکان، ئەو پزیشکە پسپۆڕەی نەخۆشییەکانی دڵ و قەستەرە ئاماژەی بەوە کرد، "چەندین هۆکار هەن، لەوانە گوشاری دەروونی، خۆراکی ناتەندروست، جگەرەکێشان، نێرگەلەکێشان و ڤەیپ."

 

د. سەرکەوت داود، هۆشداری دا کە زۆرجار گەنجان نیشانەکانی جەڵتەی دڵیان تێدا دەردەکەوێت، بەڵام بەهۆی ئەوەی پێیان وایە کێشەیەکی دیکەیە، گرنگی پێنادەن و تێیدەپەڕێنن.

 

لەبارەی رەگەزیشەوە، د. سەرکەوت داود روونیکردەوە، "تاکو تەمەنی 65 ساڵی، پیاوان زیاتر تووشی جەڵتەی دڵ دەبن، بەڵام لەدوای ئەو تەمەنەوە، رێژەکە لەنێوان ژن و پیاودا یەکسان دەبێتەوە."

 

 

• پارێزگاریکردن لە کێشێکی تەندروست.

• پەیڕەوکردنی سیستمی خۆراکیی تەندروست و دوورکەوتنەوە لە خواردنی ئامادەکراو و شەکر.

• وەرزشکردنی بەردەوام لانیکەم 150 خولەک لە هەفتەیەکدا.

• کۆنتڕۆڵکردنی سترێس و دوورکەوتنەوە لە فشاری دەروونی.

• ئەنجامدانی پشکنینی پزیشکیی پێشوەختەی ساڵانە بۆ دڵنیابوونەوە لە رێژەی شەکر، چەوری، و گوشاری خوێن.