لە 9 مانگدا زیاتر لە 19 هەزار منداڵ لە لوڕستان لەدایک بوون

 

 

ئەمڕۆ شەممە 31-01-2026، فەریبورز ئەمیری، بەڕێوەبەری گشتیی باری کەسێتیی پارێزگای لوڕستانی رۆژهەڵاتی کوردستان ئاماری لەدایکبوونی 9 مانگی سەرەتای ئەم ساڵی هەتاوی، واتە لە21-03-2025ـوە تاوەکو 21-12-2025ـی بڵاوکردەوە.

 

بەگوێرەی ئامارەکە، لەو ماوەیەدا 19 هەزار و 744 منداڵ لەدایک بوون کە هەشت هەزار و 401ـیان کوڕ و حەوت هەزار و 373ـیان کچ بوون.

 

بەگوتەی فەریبورز ئەمیری، پارێزگای لوڕستان لەڕووی ژمارەی لەدایکبوونەوە لە پلەی 13ـەمی پارێزگاکانی ئێران دێت و ''لەو ماوەیەدا لەدایکبوونی 340 دووانە و 12 سێیانەش تۆمار کراون.''

 

بەڕێوەبەری گشتیی باری کەسێتیی لوڕستان ئاماژەی بە ژمارەی گیانلەدەستدانی 9 مانگی سەرەتای ئەم ساڵی هەتاوی کورد و گوتی، هەشت هەزار و 399 کەس گیانیان لەدەستداوە کە چوار هەزار و 653ـیان پیاو و سێ هەزار و 656ـیان ژن بوون.

 

هاوکات لەو ماوەیەدا 10 هەزار و 569 پێکهێنانی ژیانی هاوژینی لە پارێزگای لوڕستان تۆمارکراوە و سێ هەزار و 163 جیابوونەوەش هەبووە.

 

پارێزگای لوڕستان 29 هەزار و 308 کیلۆمەتر رووبەری هەیە و بەگوێرەی دوایین سەرژمێریی ئێران، ژمارەی دانیشتووانەکەی دەگاتە زیاتر لە دوو ملیۆن کەس.