شارەزایەکی ئیتاڵی: قەزوان تامی شیرینە و قاوە نییە

 

 

 

بێرجس لە وەڵامی پرسیارێکدا، بارودۆخ و کەشوهەوای کوردستانی بە "نایاب" وەسف کرد. ئەو ئاماژەی بەوەدا کە جاری یەکەم لە سلێمانی و ئەم جارەش لە دهۆک بووە و چێژی لە گەشتەکانی وەرگرتووە. لەبارەی فێرکردنی خەڵکی کورد بە هونەری دروستکردنی قاوە، بێرجس رایگەیاند: "لێرەدا ئێمە جەختمان لەسەر قاوەی ئیتاڵییە. بەشێکی زۆری کارەکەمان ئەوەیە هەوڵ بدەین تێگەیشتنێک بە خەڵک بدەین لەبارەی ئەوەی قاوە چییە و لە کوێوە دێت."

 

 

شارەزا ئیتاڵییەکە ئاماژەی بەوەدا، قاوەی ئیتاڵی بریتییە لە "ئیسپرێسۆ" کە شێوازێکی تایبەتە بۆ خواردنەوەی قاوە. ئەو باسی لەوە کرد کە ئیتاڵییەکان قاوە لە سەرانسەری جیهانەوە دەهێنن و تێکەڵی دەکەن بۆ دروستکردنی تامێکی دیاریکراو. لە وەڵامی پرسیاری باشترین کاتی خواردنەوەی قاوە، بێرجس گوتی، "بۆ من هەموو کاتێکی رۆژە، چونکە هەمیشە دەیخۆمەوە، بەڵام بێگومان بۆ زۆربەی خەڵک بەیانیانە."

 

بێرجس روونیشی کردەوە کە خواردنەوەی قاوە لە ئیتاڵیا، دابونەریتێکی جیاوازی هەیە: "ئیتاڵییەکان هەمیشە تەنیا لەبەر مێزی باڕەکەدا رادەوەستن. ئیسپرێسۆ بۆ ئێمە نزیکەی وەک ساتێکی خێرایە."

 

 

بێرجس، کە ئاشنایەتی لەگەڵ قاوەی کوردی (قەزوان)دا هەیە، بە پێکەنینەوە گوتی کە ئەو خواردنەوەیە "قاوە نییە، چونکە دەنکی قاوەی تێدا بەکارنایەت." ئەو گوتی: "خواردنەوەکە زۆر شیرینە و قاوە نییە. ئەمە دەڵێم چونکە تۆ بنچینەیەکی تەواو جیاواز لە پێکهاتە و میوەی تر بەکاردەهێنیت."

 

لە کۆتایی هەڤپەیڤینەکەدا، شارەزای قاوەکە چەند شێوازێکی خواردنەوەی قاوەی بۆ تێگەیشتن لە تامەکانی شیکردەوە و، سوپاسی خەڵکی کوردستان و رووداوی کرد بۆ پێشوازییە گەرمەکەیان.