شەپۆلی بارانبارین دەستپێدەکاتەوە، سبەی کەشوهەوا چۆنە؟

 

رۆژی چوارشەممە، 1ـی نیسانی 2026، ئاسۆ کەمال، شارەزای کەشناسی بە تۆڕی میدیایی رووداوی راگەیاند، "کەشوهەوای سبەی وەک ئەمڕۆ دەبێت، کەشێکی ئاسایی و بەهاری دەبێت، بەڵام لە کاتەکانی ئێوارەوە لە هەندێک ناوچە ئەگەری بارانبارین و نمەباران هەیە."

 

بە گوتەی ئاسۆ کەمال، کەشوهەوای بەهار زوو زوو دەگۆڕێت و گوتی: "لە سەرەتای هەفتەی داهاتووەوە شەپۆلێکی ناجێگیری کەشوهەوا و بارانبارین روو لە هەرێمی کوردستان دەکاتەوە."

 

بەگوێرەی کەشناسی، سبەی ئاسمان لەنێوان پەڵە هەور و نیمچەهەوردا دەبێت، پاش نیوەڕۆ دەگۆڕێت بۆ هەوری تەواو و شەپۆلێکی بارانبارین دەستپێدەکات؛ سەرەتا لە پارێزگای دهۆک نمەباران و بارانی مامناوەند دەبێت، دواتر شەپۆلەکە درێژدەبێتەوە بۆ پارێزگاکانی هەولێر، سلێمانی و هەڵەبجە.

 

کەشناسی پێشبینی دەکات رێژەی بارانبارین لە پارێزگای دهۆک زیاتر بێت بەراورد بە پارێزگاکانی دیکە. 

 

 

هەولێر: 20 پلەی سیلیزی

سلێمانی: 19 پلەی سیلیزی

دهۆک: 17 پلەی سیلیزی

هەڵەبجە: 20 پلەی سیلیزی

گەرمیان: 25 پلەی سیلیزی

چەمچەماڵ: 20 پلەی سیلیزی

زاخۆ: 16 پلەی سیلیزی

پیرمام: 16 پلەی سیلیزی

سۆران: 16 پلەی سیلیزی

حاجی ئۆمەران: 10 پلەی سیلیزی