لە 16 پارێزگای باکووری کوردستان هۆشداریی لافاو و رەشەبا دەدرێت

 

 

بەڕێوەبەرایەتیی گشتیی کەشناسیی تورکیا پێشبینییەکانی کەشوهەوای تورکیا و باکووری کوردستانی بڵاوکردەوە. رایگەیاند، سبەی هەینی 2ـی ئایار لە 16 پارێزگای باکووری کوردستان تەواوی رۆژ لێزمەباران و ئەگەری لافاوی بەهێز لە پارێزگاکانی چەولیگ، ئامەد، ئەرزەڕۆم، قەرس، مووش، دێرسم، وان، شرنەخ، بەدلیس، خارپێت، جۆلەمێرگ، مێردین، سێرت، رووها، ئێلیە و ئەردەخان دەبێت. 

 

بەڕێوەبەرایەتییەکە هۆشداری لافاوی لەم 16 پارێزگایە دا و راشیگەیاند، خێرایی با لەنێوان 85-90 کم دەبێت لە کاژێرێکدا. 

 

سه‌رۆكایه‌تیی بەڕێوەبردنی كاره‌سات و باری له‌ناكاو (ئافاد) لە راگەیێندراوێکدا هۆشداریدا لە ئەگەری هەر چەشنە کۆبوونەوەی ئاو، لافاو، هەورە تریشقە و بای بەهێز کە گرفت بۆ هاتووچۆی هاونیشتمانییان دروست بکات. 

 

داوا لە هاونیشتمانییان دەکات، ئاگاداری خۆیان بن و زۆر پێویست نەبێت نەچنە دەرەوە. لە هەر رووداوێکی نەخوازراویشدا داوایان لێ دەکات پەیوەندیی بە هێڵە گەرمەکانەوە بکەن بۆ بەهاناوەچوونیان. 

 

بەڕێوەبەرایەتییەکە هەمان هۆشداری بۆ تەواوی پارێزگاکانی هەرێمی دەریای رەش و بەشی باکوور و باشووری رۆژئاوای تورکیا داوە و جەخت لەوە دەکاتەوە، لافاو لە هەرێمی دەریای رەش کاریگەر دەبێت.