لە هەولێر ئاگر لە شوقەیەکی پرۆژەیەکی نیشتەجێبوون کەوتەوە

 

 

نیوەڕۆی ئەمڕۆ هەینی 01-08-2025، لە نهۆمی 11ـی یەکێک لە باڵەخانەکانی پڕۆژەی نیشتەجێبوونی ئیمپایەر رۆیاڵی هەولێر ئاگر لە شووقەیەک کەوتەوە. بەختیار قادر، پەیامنێری تۆڕی میدیایی رووداو رایگەیاند، تیمەکانی بەرگریی شارستانی دەستبەجێ گەیشتوونەتە شوێنی رووداوەکە و هەوڵی کۆنترۆڵکردنی ئاگرەکەیان داوە.

 

لەکاتی رووداوەکەدا چەند کەسێک لە ماڵەکەدا بوون، بەڵام وەک پەیامنێری رووداو گوتی: ''لەگەڵ ئاگرکەوتنەوەکە دەستبەجێ بە دەرگەی پشتەوەدا هاتوونەتە دەرەوە.''

 

ئاگرەکە لەلایەن تیمەکانی بەرگریی شارستانییەوە بە تەواوی کۆنترۆڵکراوە و بەگوتەی پەیامنێری رووداو، رێگرییان لە تەشەنەسەندنی کردووە.

 

هاوکات دوو کارمەندی بەرگریی شارستانی کە بۆ کۆنترۆڵکردنی ئاگر چوونەتە نێو شووقەکەوە، بەهۆی دووکەڵ و گەرما تووشی هەناسەتەنگی و بوورانەوە بوون، بەڵام ئێستا تەندروستییان جێگیرە.

 

تائێستا هۆکاری ئاگرکەوتنەوەکە نازانرێت، بەڵام بەگوێرەی زانیارییە سەرەتاییەکان، بەهۆی شۆرتی کارەباوە بووە و رووداوەکە تەنیا زیانی مادی لێکەوتووەتەوە.

 

6ـی تەممووز، موقەدەم شاخەوان سەعید، گوتەبێژی بەرگریی شارستانیی هەولێر لە کۆنفرانسێکی رۆژنامەڤانیدا رایگەیاند، ئەم ساڵ 650 ئاگرکەوتنەوە روویانداوە کە بەراورد بە ساڵانی رابردوو 50٪ کەمیکردووە.