دواى زیاتر لە چوار مانگ، تورکش ئێیەرلاینز گەشتەکانی کەرکووک - تورکیا دەستپێدەکاتەوە

 

 

گەشتەکانی ئەو کۆمپانیایە، ئەمڕۆ چوارشەممە یەکی تشرینی یەکەمی 2025 لە فڕۆکەخانەی کەرکووکەوە بۆ تورکیا دەستیپێکردووەتەوە.

 

هەردی سەمەد، بەڕێوەبەری راگەیاندنی فڕۆکەخانەی کەرکووک، بە تۆڕی میدیایی رووداوی راگەیاند: "گەشتی ئاسمانیی کۆمپانیای تورکش ئێیەرلاینز لەگەڵ دەستپێکردنی جەنگی نێوان ئیسرائیل و ئێران راگیرابوو، ئەمڕۆ یەکەم گەشتی بۆ ئیستەنبوڵ کرا."

 

12ـی حوزەیرانی 2025، جەنگی نێوان ئیسرائیل و ئێران دەستیپێکرد و 12 رۆژ بەردەوام بوو، لەو ماوەیەدا عێراق ئاسمانەکەی بەڕووی گەشتەکاندا راگرت و کۆمپانیای تورکش ئێیەرلاینزیش لەو کاتەوە گەشتەکانی راگرتبوو.

 

بەڕێوەبەری راگەیاندنی فڕۆکەخانەی کەرکووک گوتی: "کۆمپانیای تورکش ئێیەرلاینز هەفتانە دوو گەشتی هاتن و چوون لە رۆژانی یەکشەممە و چوارشەممە دەکات."

 

گەشتی ئاسمانی لە فڕۆکەخانەی کەرکووکەوە بۆ تورکیا لە لایەن هێڵی ئاسمانیی عێراقەوە دەکرا، کە چوار گەشت بوو لە هەفتەیەکدا.