بزووتنەوەی ئیسلامی بڕیاریداوە لە سنووری مادەی 140 دەنگ بدات
رووداو دیجیتاڵ
هەرچەندە بزووتنەوەی ئیسلامی بەشداریکردنی لە هەڵبژاردنی پەرلەمانی عێراق لە بازنەکانی هەرێمی کوردستان بایکۆت کردووە، بەڵام بەپێچەوانەوە بڕیاریداوە لە سنووری مادەی 140 لە بازنەکانی کەرکووک، نەینەوا و دیالە دەنگ بدەن.
حەسەن ئەمین بەرزنجی، ئەندامی مەکتەبی سیاسیی بزووتنەوەی ئیسلامیی کوردستان، ئەمڕۆ شەممە بە تۆڕی میدیایی رووداوی راگەیاند، حیزبەکەی بڕیاریداوە کادر و لایەنگرانی لە سنووری بازنەکانی کەرکووک، نەینەوا و دیالە رابسپێرێت بۆ ئەوەی دەنگ بە لایەنێکی کوردستانی بدەن و دەنگی کورد نەفەوتێت.
بە گوتەی حەسەن بەرزنجی، بەلای رابەری گشتیی حیزبەکەی و ئەنجوومەنی سەرکردایەتییەوە، دەنگدان لەو سنوورانە رەهەندێکی نیشتمانیی هەیە و نابێ دەنگی کورد بفەوتێت.
ئەو ئەندامەی مەکتەبی سیاسیی بزووتنەوەی ئیسلامیی کوردستان، بڕیاری دەنگدانی حیزبەکەی لە بازنەکانی دەرەوەی ئیدارەی هەرێمی کوردستان بۆ دوو بنەما گەڕاندەوە:
یەکەم: بەشدارییەکی چڕ بکرێت لە کەرکووک و ناوچە کوردستانییەکانی دیکە، چونکە بابەتێکی نەتەوەییە و چارەنووسسازە.
دووەم: دەنگ بەو لایەنە بدەین کە دڵنیابین دەنگی کورد نافەوتێنن و دەنگەکان ناسووتێن، دەبێ دڵنیابین لەوەی کورسی دەبەنەوە.
لەبارەی ئەوەی دەنگەکانیان بۆ کام لایەن دەبێت، حەسەن ئەمین بەرزنجی گوتی: "بەرپرسانی باڵای پارتی لە سنوورەکە بۆ ئەو مەبەستە سەردانیان کردووین، بەڵام جارێ ماوە و هەفتەی داهاتوو ئەنجوومەنی سەرکردایەتی کۆدەبێتەوە و بڕیار دەدەین."
گوتیشی: "بزووتنەوەی ئیسلامیی کوردستان دەنگ بەو لایەنە دەدات کە زۆرترین کات بەدەمیەوە هاتبێت و سەردانیان کردبن."