دەزگای روانگە 250 هەلی کار لە کەرکووک دەڕەخسێنێت

 

شەیما عەلی، دەرچووی بەشی زمانی عەرەبییە لە کۆلێژی پەروەردەی کەرکووک، دەڵێت: "ماوەی پێنج ساڵە خوێندنم تەواو کردووە، بەدوای دامەزراندندا دەگەڕێم و سوودی نەبووە. لە ئینستاگرام ئاگادارییەکەی دەزگای روانگەم بینی و هاتم بۆ ئێرە تاوەکو سیڤیی خۆم پێشکێش بکەم، بەو هیوایەی شانس یاوەرم بێت."

 

دەزگای روانگە بە هەماهەنگی لەگەڵ UNDP (بەرنامەی نەتەوە یەکگرتووەکان بۆ پەرەپێدان)، 250 هەلی کاری لە کەرتی تایبەت بۆ گەنجانی کەرکووک رەخساندووە.

 

سامان سەمەد، بەرپرسی لقی کەرکووکی کۆمپانیای سەردار کە کۆمپانیاکەیان زۆرترین هەلی کاری لە پێشانگەکەدا راگەیاندووە، دەڵێت: "وەکو گرووپی کۆمپانیاکانی سەردار، ئێستا لە کەرکووک سێ پڕۆژەمان هەیە و پێویستمان بە نزیکەی 51 کارمەندە. لەگەڵ هاتنی ساڵی نوێی 2025، پڕۆژەی دیکەشمان دەبێت، نەک تەنیا لە کەرکووک، بەڵکو لە زۆربەی پارێزگاکانی عێراق."

 

دەزگای روانگە بۆ ئەم پێشانگەیەی هەلی کار، 50 کۆمپانیای نێوخۆیی بانگهێشت کردووە و بەنیازە ساڵی داهاتووش چەند پێشانگەیەکی دیکەی هاوشێوە لە کەرکووک بکاتەوە.

حەسەن شێخ عەلادین، بەڕێوەبەری جێبەجێکاری دەزگای روانگە ئاماژەی بەوە کرد، درکیان بەوە کردووە "بۆشاییەکی زۆر" لە کارکردن لەنێو گەنجانی کەرکووکدا هەیە، بۆیە بە باشیان زانیوە ئەم پێشانگەیە بە بەشداریی پەنجا کۆمپانیا بهێننە شارەکە.

 

بەڕێوەبەری جێبەجێکاری دەزگای روانگە گوتیشی: "هەر کۆمپانیایەک بەپێی ئەو گرێبەستەی لەگەڵ دەزگای روانگە و UNDP واژۆی کردووە، دەبێت سێ گەنج بخاتە سەر کار. ئەمە دەستپێکێکی سەرەتاییە و پشت بە خوا کاروانی خزمەتەکانی دەزگای روانگە بە هەماهەنگی هەموو لایەک لە کەرکووک بەردەوام دەبێت."

 

پێشانگەکە دوو رۆژ دەخایێنێت، ئەو گەنجانەی بەدوای هەلی کاردا دەگەڕێن، سیڤییەکانیان رادەستی ئەو کۆمپانیایانە دەکەن کە دەیانەوێت کاری تێدا بکەن.